भांगरभूंय | प्रतिनिधी
गोंय दर्यादेग वेवस्थापन प्राधिकरणाचो आदेश
पणजीः हणजुणा दर्यादेगेर सीआरझेड नेम मोडिल्ल्यान गोंय दर्यादेग वेवस्थापन प्राधिकरणान एक आस्थापन मोडून उडोवपाचे आदेश काडल्या. जाल्यार एका बांधकामाक अभय दिलां. तशेंच एका आस्थापनाच्या धनयान स्वता आपलें आस्थापन मोडून उडोवपाचें उतर प्राधिकरणान दिलां.
हणजूण दर्यादेग वाठारांत सीआरझेड आनी एनडीझेड मळार नेम मोडपी १७५ आस्थापनां सिल करपाचो आदेश उच्च न्यायालयान काडिल्लो. पंचायत राज कायदो आनी गोंय जमीन उदरगत आनी बांदकाम कायद्या खाला ह्या आस्थापनांनी बांधकामा खातीर लिसेन्स घेतलां काय ना तांची पळोवणी करची असो न्यायालयान आदेश दिल्लो. ते प्रमाण पंचायत आनी जीसीझेडएमेन पळोवणी करून १७५ आस्थापनां सिल करून तांकां कारणां दाखय नोटीस काडली.
ह्या नोटीसांचेर २६ जाणांची सुनावणी प्राधिकरणान आफयिल्ली. तातुंतले इव्हा कॅफे हें आस्थापन मोडून उडोवपाचो आदेश प्राधिकरणान दिवन अतुल कलरा हांचें बांधकाम साल्वार केलां. जाल्यार थ्री आमीगोस ह्या आस्थापनाच्या धनयान स्वता तें मोडून उडोवपाचें प्राधिकरणाक सांगलां.
इव्हा कॅफे हांची धनी ब्लॉंच डिसोझा हांचे कडेन इव्हा कॅफे हे सासणाच्या बांधकामा खातीर सरकारी खात्या कडल्यान कसलीच वैध परवानगी घेंवक नाशिल्ल्याचें दिसून आयलें. देखून प्राधिकरणान हें आस्थापन मोडून उडोवपाचो आदेश दिलो. थ्री आमीगोस आस्थापनाचे साईनाथ कोनाडकार हांणी सांगलें, हें आस्थापन तांचे मालकीचे न्हय. तर तांणी ते भाड्याक चलोवपाक घेतलां. उपरांत ह्या आस्थापनाची धनी कल्पना परब हांणी प्राधिकरणांक सांगलें, तिणें आपलें आस्थापन स्वता मोडून उडोवपा खातीर प्रक्रीया चालीक लायल्या आनी हे विशीं अहवाल सादर करपाक वेळ मागला.
जाल्यार अतुल कलरा हांणी आपलें बांधकाम कायदेशीर आसा हें सिध्द करपाक वेगवेगळीं कागदपत्रां दाखयलीं. तांच्या बांधकामाचे आदल्या धनयाक २००८ वर्सा हणजूण पंचायतीन नोटीस काडिल्ली. मात हें बांदकाम १९९१ वर्साचें आशिल्ल्यान ही नोटीस भायरायली. तशेंच भूंय सर्वेक्षण खात्यान तयार केल्ल्या आराखड्यांत ६ बांधकामां १९९१ पयलींचीं आसात हें दाखयलें. तशेंच धनयान १९८३ सालात घर कर पट्टीचे रिसीट दाखयलें. तशेंच साल १९९२ सात गेस्ट हावस बांधपा खातीर पंचायतीन दिल्लें प्रमाणपत्र दाखयलें. ते भायर प्राधिकरणान ह्या बांधकामांत शॅक आनी लाकडाच्यो कॉटेजी बांदपाक परवानगी दिल्या अशें धनयान दाखोवन दिलें. सगल्या कागदपत्रांची पडटाळणी केले उपरांत हें बांदकाम १९९१ पयलीचें आशिल्ल्याचें सिध्द जाता अशें सांगून हें बांदकाम प्राधिकरणान साल्वार केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
