भांगरभूंय | प्रतिनिधी
‘सीझॅडएमपी 2019’ मंजूर जाले उपरांतूच गोंयांत अंमलबजावणी
भांगरभूंय I प्रतिनिधी
पणजी : दर्यादेग क्षेत्र (सीआरझॅड) 2019च्या नव्या परिपत्रका प्रमाण, सीआरझॅड वाठारांतल्या बांदकामांक परवाने दिवपाचो अधिकार पंचायती तशेंच नियोजन आनी विकास प्राधिकरण (पीडीए) हांकांय दिवपाचे निवेदन केंद्रीय पर्यावरण आनी वातावरण बदल मंत्रालयान दर्यादेग राज्यांक धाडल्यात. पूण गोंयचो दर्यादेग क्षेत्र वेवस्थापन आराखडो (सीझॅडएमपी) मंजूर जाले उपरांतूच राज्यांतल्यो पंचायती, पीडीए हांकां ह्या निर्णयाचो लाव मेळटलो.
सीआरझॅड 2019च्या परिपत्रका प्रमाण दर्यादेग वाठारांल्या बांदकाम प्रकल्पांक परवाने दिवपाचे अधिकारी हाचे पयलीं पर्यावरण आनी वातावरण बदल मंत्रालय तशेंच दर्यादेग क्षेत्र वेवस्थापन प्राधिकरणाक (सीझॅडएमए) आशिल्ले. पूण आतां 300 चौखण मिटर ‘बिल्ट अप’ क्षेत्राच्या घरांच्या प्रस्तावांक थळावी पंचायत परवानो दिवपाक शकतली. जाल्यार पीडीए 2006च्या तजवीजे खेरीत बांदकाम प्रकल्पांक परवानगी दिवपाक शकतली. पूण गोंयांत हे सगले दर्यादेग क्षेत्र वेवस्थापन आराखडो 2019चेरूच निंबून आसा.
गोंया खातीरच्या नव्या दर्यादेग क्षेत्र वेवस्थापन आराखड्याक केंद्रा कडल्यान अजुनूय मंजुरी मेळूंक ना वा तो अधिसूचीत जावंक ना. ताका लागून गोंयांतल्यो पंचायती, पालिका वा पिडिएक बेगोबेग केंद्राच्या नव्या निर्णयाचो लाव घेवपाक मेळचो ना. दर्यादेग क्षेत्र वेवस्थापन आराखड्याक केंद्रा कडल्यान मंजुरी मेळ्ळे उपरांत आनी तो अधिसूचीत जाले उपरांतूच पंचायती, पिडीए तशेंच राज्यांतल्या कांय पालिकांक हाचो फायदो मेळटलो.
मजगतीं, राज्यांत सीआरझॅड वाठारांतल्या बांदकामांक परवानगी दिवपा पयलीं दर्यादेग क्षेत्र वेवस्थापन प्राधिकरणाची (सीझॅमएमए) भुमिका म्हत्वाची थारताली. पळोवणी आनी मुल्यांकन करून ‘सीआरझॅडां’त बांदकामांक परवाने दिवपाचा वा ना, हे थारावपाचो अधिकार 2011 च्या अधिसुचोवणे प्रमाण ‘सीझॅमएमए’ कडेन आशिल्लो. पूण पर्यावरण आनी वातावरण बदल मंत्रालयाच्या निर्णयाची फुडारांत गोंयांत अंमलबजावणी जाल्यार ‘सीझॅडएमए’चो हो अधिकारूय आपसूकच ना जातलो.
फेब्रुवारी मेरेन आराखडो तयार
दर्यादेग क्षेत्र वेवस्थापन आराखडो (सीझॅडएमपी) तयार करपाच्या कामाक फाटल्याच सप्तकांत वर्क ऑर्डर मेळिल्ली आसून फेब्रुवारी मेरेन आराखडो तयार जातलो, अशी म्हायती सुत्रां कडल्यान मेळ्ळ्या.
दर्यादेग क्षेत्र वेवस्थापन आराखड्या वयल्यान गोंयांत फाटल्या कांय वर्सां पसून वाद सुरू आसा. पर्यावरण खात्यान आराखड्याचो मसुदो सुचोवणी आनी हरकती खातीर पंचायतींनी दवरून तशेंच हे विशीं दोनूय जिल्ह्यांनी जनसुनावण्यो घेवन आराखड्याक मंजुरी मेळोवपाचो यत्न केला. पूण फाटल्या तीन वर्सां पसून खात्याक तातूंत सातत्यान अपेसूच आयलां.
आराखड्या विरोधांत पर्यावरण मोगी न्यायालयांतूय गेल्यात. तातूंतच पर्यावरण मंत्रालयान सीआरझॅम क्षेत्रांतल्या बांदकामांक परवाने दिवपाचे अधिकारी थळाव्यो पंचायती आनी पिडीएक दिल्ल्यान आनी दर्यादेग वेवस्थापन क्षेत्र आराखडो मंजूर जाले खेरीत ह्या निर्णयाची गोंयांत अंमलबजावणी जावप शक्य नाशिल्ल्यान पर्यावरण मोग्यां कडल्यान परतून एकदा आराखड्याक विरोध जावपाची शक्यताय आसा.
सीआरझॅड क्षेत्रांत बांदकामांक परवाने दिवपाचे अधिकारी थळावी स्वराज्य संस्था आनी पिडीएक मेळ्ळ्यार गोंयांत मोट्या प्रमाणांत सैमाची लुकसाणी जावन अशा क्षेत्रांतल्या बांदकामांक ओतो येवपाचो दावो पर्यावरण मोगी राजेंद्र केरकार हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
