भांगरभूंय | प्रतिनिधी
पणजी : सीआरझॅड वाठारांत रेंव काडपाक हरकत ना, असो अहवाल एनआयओन दिल्लो आसलो तरी सीआरझॅड अधिसुचोवणेंत दुरुस्ती जावंंक नाशिल्ल्या कारणान रेंव काडपाचेर निर्बंंध कायम आसात. सीआरझॅड अधिसुचोवणेंत दुरुस्ती जाले उपरांंत रेंव काडपाचे जागे वाडोवप शक्य जातले. खण खात्यांतल्या गोपांं कडल्यान ही म्हायती मेळ्ळ्या.
सीआरझॅड वाठारांत रेवेंचे प्रमाण चड आसा. अधिसुचोवणे प्रमाण सीआरझॅड वाठारांत रेंव काडपाक मेळना. तरी बेकायदाे रेंव सीआरझॅड वाठारांत चड काडटात. सीआरझॅड वाठारांतल्या थारावीक थळांंचेर रेंव काडपाक मान्यताय दिली जाल्यार बेकायदाे रेंव काडपाच्या प्रकारांक आळो मेळप शक्य आसा. सीआरझॅड अधिसुचोवणेंत दुरुस्ती करची अशी मागणी गोंंयच्या पर्यावरण खात्यान केंद्रीय रानां आनी पर्यावरण मंंत्रालया कडेन केल्या. हे मागणेक स म्हयन्यां परस चड कालावधी जाला. स म्हयन्यां परस चड कालावधी जावन लेगीत अजून हे विशीं निर्णय जावंंक ना. हाका लागून सीआरझॅड वाठारांत रेंव काडपाक सरकार मान्यताय दिवंक शकना. खण खात्याच्या गोपांं कडल्यान ही म्हायती मेळ्ळी.
सीआरझॅड वाठारांत रेंव काडपाचेर बंंदीची तजवीज 2011च्या अधिसुचोवणेंत आसा. हे अधिसुचोवणेंत दुरुस्तीची सरकाराची मागणी आसा. सीआरझॅड वाठारांत रेंव काडली जाल्यार न्हंय वा पर्यावरणाचेर कसलो परिणाम जातलो? हाचो अभ्यास करपाचें काम सरकारान एनआयओक दिल्लें. खंंडपिठान लेगीत एके याचिकेच्या प्रस्नाचेर अभ्यास करपाचे आदेश दिल्ले. एनआयओन शापोरा न्हंंये विशीं अभ्यास केला. सीआरझॅड वाठारांत रेंव काडली तरी कसलोच परिणाम जावचो ना असो निश्कर्श एनआयओंतल्या वैज्ञानिकांंनी काडला. ह्या अहवाला उपरांंत गोंंय सरकारान सीआरझॅड अधिसुचोवणेंत दुरुस्ती करपाचो प्रस्ताव केंद्रीय रानां आनी पर्यावरण मंंत्रालयाक सादर केलो. केंद्रान हे विशीं अजून निर्णय घेवंंक ना.
गिमाच्या दिसांनी गोंंयच्या न्हंंयांनी भरपूर उदक आसता. तशेच गिमांत तांंकां सुकती येना. हाका लागून रेंव काडली तरी न्हंंयो आटच्यो नात अशें एनआयओन म्हणलां. हेर राज्यांं परस गोंंयच्या न्हंंयांची गजाल वेगळी आसा. कुडचड्यार रेंव माफिया मदीं फारपेट जावन एकल्याक मरण आयलें. गोंयांंत लेगीत सीआरझॅड अधिसुचोवणी दुरुस्ते विशीं फाटपुरवण करूंक ना अशी म्हायती गोपांनी दिली.
एनआयओन शापोरा न्हंंयेचो अभ्यास करून अहवाल सादर केला. हेर न्हंयांंचो अभ्यास सुरू आसा. गोंयांत बांंदकामांं व्हड प्रमाणांत सुरू आसात. बांंदकाम वेवसाय हो एक स्वतंंत्र उद्देग जाला. घरांं तशेंच रस्त्यांची कामां सुरू आसात. घरां, रस्ते तशेंच घरबांंदणी प्रकल्पांंक रेंव लागता. रेंवची जितली गरज आसा तितली पुरवण जायना. हाका लागून बेकायदाे रेंव काडपा सयत गोंयांत रेंव माफियांचे प्रमाण वाडलां. रेंवेचे दर वाडल्यात. रेंवेचे दर सामान्यांक परवडपा सारके नात. सीआरझॅड अधिसुचोवणेंत दुरुस्ती जाली, जाल्यार रेंव काडपा वयले निर्बंंध उणे जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
