भांगरभूंय | प्रतिनिधी
प्रत्यक्ष पळोवणी करपाचे मुख्य नगर नियोजकांचे अधिकाऱ्यांक निर्देश
भांगरभूंय I प्रतिनिधी
पणजी : सामाजीक कार्यकर्ते अॅड. आयरीश रॉड्रिग्स हांचे कागाळे उपरांत केंद्रीय मंत्री स्मृती इराणी हांची चली चलोवपी आसगांवांतल्या सिली सोल बार अॅण्ड रेस्टारंटाची प्रत्यक्ष पळोवणी करपाचे निर्देश उत्तर गोंयच्या वरिश्ठ नगर नियोजकानी शेनवारा दिल्यात.
स्मृती हांची चली झोईश इराणी मरण पाविल्ल्या व्यक्तीच्या नांवार परवानो घेवन सिली सोल बार अॅण्ड रेस्टॉरंट चलयता असो आरोप काँग्रसच्या दिल्लींतल्या फुडाऱ्यांनी केलो. काँग्रेसीन केंद्रीय मंत्रीपदार आशिल्ली स्मृती इराणी हांच्या राजिनाम्याची मागणी केली.
मजगतीं, काँग्रेसच्या ह्या आरोपा उपरांत सामाजीक कार्यकर्ते आयरीश रॉड्रिग्स हांणी हे विशीं म्हायती हक्क कायद्या खाला म्हायती मेळोवन स्मृती इराणी हांचे चलयेन फटीचीं कागदपत्रां सादर करून अबकारी खात्याचे परवाने मेळयिल्ल्याचो आरोप केलो. उपरांत जे जमनींत बार अॅण्ड रेस्टॉरंट आसा ते जमनीची बेकायदो मातयेचो भराव घालून थंय बांदकाम केल्ल्याचो दावो केला. तशेंच ह्या बांदकामाची बेगोबेग चवकशी करपाची मागणी मुख्य नगर नियोजक राजेश नायक हांचे कडेन पत्रा वरवीं केली. ह्या पत्राची दखल घेवन राजेश नायक हांणी उत्तर गोंय वरिश्ठ नगर नियोजकांक ‘सिली सोल’ बांदकामाची प्रत्यक्ष पळोवणी करपाचे निर्देश दिल्यात.
स्मृती इराणींचे अडचणींत वाड
फटीचीं कागदपत्रां सादर करून इराणी कुटुंबियानी अबकारी खात्याचे परवाने मेळयिल्ल्याचो आयरीश रॉड्रिग्स हांचे कागाळे उपरांत अबकारी आयुक्त नारायण गाड हांणी शुकारच्यान सुनावण्यो सुरू केल्यात. ह्या प्रकरणाची फुडली सुनावणी 22 ऑगस्टाक दवरल्या. आतां रेस्टॉरंटाचें बांदकाम बेकायदो केल्ल्याचो दावो जाल्ल्यान आनी ताच्या प्रत्यक्ष पळोवणीचे निर्देश दिल्ल्यान स्मृती इराणी हांच्या अडचणींत वाड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
