भांगरभूंय | प्रतिनिधी
फास्ट बॉलर मोहम्मद सिराजाची भारताच्या पंगडांत निवड केल्या. दक्षीण आफ्रिके आड चालू आशिल्ले तीन टी-20 मॅचींचे माळेंत तो फास्ट बॉलर जसप्रीत बुमराचे सुवातेर खेळटलो.
दुखापतीक लागून फास्ट बॉलर जसप्रीत बुमराचो ऑस्ट्रेलियेंत जावपी संवसारीक टी-20 सर्तींत खेळपा विशीं दुबाव उप्रासला.
28 वर्सां पिरायेच्या मोहम्मद सिराज सात म्हयने आनी दोन दिसां उपरांत भारतीय पंगडांत पुनरागमन केलां. ताणें अंदूं फेब्रुवारींत आपली निमाणी आंतरराष्ट्रीय टी-20 मॅच खेळिल्लो. ही मॅच श्रीलंके आड धर्मशालांत जाल्ली.
हैदराबादाच्या मोहम्मद सिराजान श्रीलंके आड चार ओव्हरींनी 22 धांवड्यो दितना एक विकेट घेतिल्ली. ते उपरां तो टॅस्ट, वन डे, आयपीएल आनी पयले श्रेणीचे मॅचींनी खेळिल्लो.
जसप्रीत बुमराक बरो जावपाक चार ते स म्हयने लागुये. दक्षीण आफ्रिके आड जाल्ले पयले मॅची खातीर पंगडांत नाशिल्लो. बुमराक बंगळुरूंत सराव करतना फाटीची दुखापत जाल्ली. ते उपरांत वैजकी पंगडाच्या सल्ल्या उपरांत ताणें आफ्रिके आडचे माळेंतल्यान फाटीं सरलो. दुखापतीक लागून ताका आशिया करंड सर्तींत लेगीत खेळपाक मेळूंक नाशिल्लें.
जसप्रीत बुमराक पुर्ण आशिया करंड सर्त चुकिल्ली. ते उपरांत ऑस्ट्रेलिये आड जाल्ले टी-20 माळे वरवीं ताचें पुनरागमन जाल्लें. ऑस्ट्रेलिये आडचे माळेंतली पयली मॅच लेगीत तो खेळूंक नाशिल्लो. दुसरे मॅचींत तो खेळिल्लो.
बुमरा अजून संवसारीक सर्तींत खेळुये
ह्या म्हयन्यांत ऑस्ट्रेलियेंत जावपी संवसारीक टी-20 सर्तींत फास्ट बॉलर जसप्रीत बुमरा अजून खेळपाक शकता. संवसारीक टी-20 सर्त सुरू जावपाक अजून वेळ आसा, ताका लागून तो मैदानांत पुनरागमन करपाक शकता आनी तो खेळपाक लेगीत शकता अशें बीसीसीआयचो अध्यक्ष सौरव गांगुलीन म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
