भांगरभूंय | प्रतिनिधी
विजय भिकेः गोंयांत भाजपा सरकाराच्या काळांत घुंवळे वखदांच्या वेव्हारांत वाड
भांगरभूंय । प्रतिनिधी
म्हापशें: भाजपा फुडारी सोनाली फोगट मरण प्रकरणाच्या तपासा खातीर सगळी सरकारी यंत्रणा सरकारान कामाक लायली. पूण सिद्धी नायक आनी महम्मद आगा ह्या गोंयकार भुरग्यांच्या मरण प्रकरणाक समान न्याय सरकारान दिवंक ना, असो आरोप काँग्रेस फुडारी विजय भिके हांणी केलो.
म्हापश्या पक्षाच्या कार्यालयांत शेनवारा घेतिल्ले पत्रकार परिशदेंत भिके उलयताले. तांचे वांगडा पक्षाचे उत्तर गोंय जिल्होध्यक्ष विरेंद्र शिरोडकार हाजीर आशिल्ले.
मरण आयिल्ली फोगट हांचें गोंया खातीर कसलेंच योगदान ना. ती फक्त भाजपाची फुडारी आशिल्ली. हेच खातीर सरकारान तिच्या मरण प्रकरणाची दखल घेवन सगळ्या यंत्रणांक कामाक लायली. भाजपा सरकार गोंयांत येत सावन राज्यांत घुंवळे वखदांचो वेव्हार वाडला. तातूंत भाजपा फुडारी आनी तांचे कार्यकर्ते वांटेकार आसात. 2018 त पिसुर्ल्यां भाजपाच्या एका पदाधिकाऱ्याच्या कारखान्यांत केटामायन ह्या घुंवळे वखदांचो व्हड सांठो सांपडिल्लो. फोगट हिका चड प्रमाणांत घुंवळे वखदां घेतिल्ल्यान आयिल्ल्याचो दावो तपास यंत्रणांनीच केला. फोगट मजा मारपाक गोंयांत आयिल्ली. तिका घुंवळे वखदां चड प्रमाणांत घेतिल्ल्यान मरण आयलां, हें स्पश्ट आसा. ल्हान ल्हान कारवायो करून घुंवळे वखदांच्या वेव्हाराचेर आळाबंद हाडटा, असो सरकार झेत मारता. घुंवळे वखदांच्या वेव्हाराच्या मुळा मेरेन वचपा खातीर सरकार कसलीच ठोस कृती आंखिना. सध्या बंदखणींतल्यान लेगीत घुंवळे वखदांचो वेव्हार चलता. ताका कोणाचो आशिर्वाद आसा, असो प्रस्न भिके हांणी केलो.
गोंयांत कायदो सुवेवस्था पुराय कोसळ्ळ्या. चोरयो, लुटमार, बलात्कार हे सारकीं प्रकरणां सद्दां उजवाडाक येतात. हाचोच अर्थ गोंयचे गृह मंत्री सक्षम ना. तशेंच हेर मंत्री लेगीत कारकुना भशेन वावर करतात, अशेंय भिके हांणी सांगलें. हणजूणेंच्या वादग्रस्त कर्लिस रॅस्टोरण्टाचेर सरकारान कारवाय केली, पूण ताची खरी वाड तेन्नाच्या भाजपा आमदाराच्या कार्यकाळांतूच जाली. ते सुमार 25 वर्सां आमदार आनी सत्तेंत आशिल्ले. भाजपाचे पंच आनी कार्यकर्ते तशेंच आमदार लेगीत तातूंत घुस्पल्ले. ताकाच लागून वेळार कारवाय जावंक ना. आतां लोकांचो विस्वास जिखचे खातीर सरकार ही कारवाय करता. तशेंच गोंय पुलीस लेगीत भाजपा सरकाराच्या चेपणा खाला काम करतात, अशी टिका भिके हांणी केली.
सरकारान योग्य तपास करूंक नाः भिके
सिद्धी नायक हिका न्याय मेळचो हे खातीर काँग्रेस तशेंच लोकांनी आवाज केलो आनी ह्या प्रकरणाक वाचा फोडपाचो यत्न केलो. जाल्यार महम्मद आगा हाका लेगीत दुबावीत रितीन मरण आयलें. पूण भाजपा सरकारान दोनूय प्रकरणांचो योग्य तरेन तपास करूंक ना, असो आरोप विजय भिके हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
