भांगरभूंय | प्रतिनिधी
-कूड बॅगेंत घालून पळिल्ले बायलेक कर्नाटकांत अटक
म्हापशेंः चार वर्सांच्या भुरग्या सयत पर्यटक म्हूण सिकेरी कांदोळे एका हॉटेलांत राविल्ल्या बायलेन त्या भुरग्याचो खून करून कूड बगेंत घालून बंगळूरू (कर्नाटकाक) पळ काडलो. पूण हॉटेलांतल्या कर्मचाऱ्यांच्या सादूरतायेक लागून तिका अटक करपाक पुलिसांक येस आयलें. हे विशीं चित्रदुर्ग कर्नाटक पुलिसांक म्हायती दिले उपरांत तांणी ते बायलेक भुरग्याचे कुडी सयत अटक केल्या.कळंगूट पुलीस तिका ताब्यांत घेवपाक कर्नाटकांत गेल्यात.
बंगळुरूंतली एक बायल शेनवारा 6 जानेवारीक सिकेरी एका हॉटेलांत देंवली. तिचे वांगडा 4 वर्सांचो भुरगो आशिल्लो. 8 जानेवारीक तिणें हॉटेल सोडले. भाड्याची टॅक्सी करून ती बंगळुरू कडेन वचपाक गेली. जेन्ना तिणें हॉटेल सोडले, तेन्ना तिचे वांगडा तो चार वर्सांचो भुरगो नाशिल्लो. ताका लागून हॉटेल कर्मचाऱ्यांक दुबाव आयलो. ताणें हे विशीं कळंगूट पुलिसांक म्हायती दिली.
कळंगूट पुलिसांनी हॉटेलांत येवन तपास केलो, तेन्ना हॉटेलाचे कुडींत रगत मेळ्ळे. पुलिसांनी रोखडीच तिका घेवन वचपी टॅक्सी चालका कडेन संपर्क केलो. तेन्ना ताची मोटार चित्रदुर्गा पाविल्ली. ती बायल ते टॅक्सींत आशिल्ली. पुलिसांनी तिचे कडल्या भुरग्या विशीं विचारणा केली, तेन्ना ती योग्य जाप दिवंक शकली ना.
दुबाव आयिल्ल्यान पुलिसांनी थंयच्या थळाव्या पुलिसां कडेन संपर्क केलो आनी म्हायती दिली. ते प्रमाण चित्रदुर्ग पुलिसांनी तिका ताब्यांत घेतली. तिच्या बॅगेची तपासणी केली तेन्ना बॅगेंत भुरग्याची कूड मेळ्ळी.
कळंगूट पुलिसांनी ह्या प्रकरणांत मुळाव्या म्हायतीच्या आदारान खूनाचो गुन्यांव नोंद केला. तशेंच दुबावीत बायलेक ताब्यांत घेवपाक कळंगूट पुलीस निरिक्षक परेश नायक आनी पंगड चित्रदुर्गा गेल्यात.
मजगतीं, खून जाल्लो भुरगो ते बायलेचो आसा वा पळोवन हाडिल्लो ते अजून समजूंक ना. ह्या कृत्या फाटल्यान तिचो कितें हेत आशिल्लो, हे विशीं सविस्तर म्हायती तिका गोंयांत हाडून चवकशी केले उपरांत कळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
