सिंधूक संवसारीक वस्तादपण सर्त चुकतली

भांगरभूंय | प्रतिनिधी

दोन खेपेची ऑलिम्पीक पदक जैतिवंत पी व्ही सिंधून खोटेचे दुखापतीक लागून संवसारीक बॅडमिंटन वस्तादपण सर्तींतल्यान फाटीं सरपाचो निर्णय घेतला.

हालींच सोंपिल्ले बर्मिंहॅम राष्ट्रकूल खेळां सर्तींत भांगरा पदक जिखिल्लें. तिणें पयलेच खेपे राष्ट्रकूल खेळां सर्तींत भांगरा पदक जिखिल्लें. पूण, भांगरा पदक मेळोवपाक तिका आडखळींक तोंड दिवचें पडलें. तेच आडखळीचें तिका मोल फारीक करचें पडलां. भांगरा पदक जिखपाक इत्सूक आशिल्ली सिंधू जखमी आसतना फायनलींत खेळ्ळी. आतां तीच दुखापत गंभीर जाल्या. हेच दुखापतीक लागून तिका ह्या म्हयन्यांत जावपी संवसारीक बॅडमिंटन वस्तादपण सर्तींत खेळपाक मेळचें ना.

राष्ट्रकूल खेळां सर्तींतली फायनल जिखून परत हैदराबाद शारांत आयल्या उपरांत तिणें एमआरआय केलो. तातूंत तिच्या दाव्या पांयाक स्ट्रेस फॅक्चर आशिल्ल्याचें स्पश्ट जालें. हे दुखापतीचो त्रास जावपाक लागिल्ल्यान आपूण संवसारीक बॅडमिंटन वस्तादपण सर्तींत खेळपाक शकची ना अशें तिणें उजवाडायिल्ल्या पत्रकांत म्हणलां. कांय सप्तक विसव घेवपाचो सल्लो दोतोरांनी दिलां अशें पत्रकांत मुखार म्हणलां. कांय काळा उपरांत आपूण परतून सराव सुरू करतली अशें तिणें मुखार म्हणलां.

22 ते 28 ऑगस्टा मेरेन बीडब्ल्यूएफ संवसारीक वस्तादपण सर्त जपानाच्या टोकियो शारांत जातली.

संवसारीक बॅडमिंटन वस्तादपण सर्तींत सिंधूचो रॅकॉर्ड जबरदस्त आसा. 2019त तिणें भांगरा पदक जिखिल्लें. तशेंच दोन रुप्या पदकां आनी दोन कांश्या पदकां जिखल्यात.

मजगतीं, बर्मिंहॅम राष्ट्रकूल खेळां सर्तीचे क्वॉर्टरफायनलींत तिका पयले खेपे दुखापत जाल्ली. तरी आसतना ती सेमीफायनलींत खेळ्ळी अशें तिचो बापूय पी व्ही रमण हांणी सांगलें.

संवसारीक बॅडमिंटन वस्तादपण सर्तींत खेळपाक मेळना म्हणून सिंधू निर्शेल्या. सध्या ती फॉर्मांत आशिल्ली. सिंगापूर ओपनांत अंदूंच्या हंगामांतलें पयलें वस्तादपण जोडल्या उपरांत तिणें राष्ट्रकूलांत भांगर जोडलें. संवसारीक बॅडमिंटन वस्तादपण सर्तींत खेळपाक ती इत्सूक आशिल्ली. पूण, कांय गजाली आमच्या हातांत ना अशें पी व्ही रमण हांणी सांगलें.

सध्या ती दुखापतींतल्यान पुर्ण बरी जावपाची यत्न करतली आनी उपरांत डॅनमार्क आनी पॅरीस ओपन ह्या सर्तींनी खेळपाचो यत्न करतले अशें रमण हाणें अखेरेक सांगलें.