भांगरभूंय | प्रतिनिधी
पाकिस्तानांतल्या शरीफ सरकारा मुखा वेलीं आव्हानां उणी जावपा बदला वाडतूच आसात. भारतान राबयिल्ल्या ऑपरेशन सिंदुरान पाकिस्तानाची संवसारभर नाचक्की जाली. भारतांत पाकिस्तानांत घुसून पाकिस्तानाक जो धडो शिकयलो ताणें पाकिस्तानांतले लोक पाकिस्तानाच्या शहाबाज शरीफ सरकाराचेर तिडकून आसात. तातूंत पाकिस्तानाच्या बलुचिस्तानांत स्वतंत्र बलुचिस्ताना खातीर बलुचिस्तानी नागरिकांनी पाकिस्ताना आड आव्हान उबें केलां. बलुच लिबरेशन आर्मीन पाकिस्तानी लश्करा आड लढो पुकारून स्वतंत्र बलुचिस्तानाची घोशणा लेगीत केली. शिमेर भारतीय लश्करा कडेन आनी शिमे भितर बलुचिस्तान लिबरेशन आर्मी कडेन झुजतना पाकिस्तान अक्षरशा भिकेक पावला. पाकिस्तानाची अर्थवेवस्था भांकरूट जाल्ल्यान पाकिस्तान संवसारांत भिकेची कट्टी घेवन भीक मागूंक भोंवता. आंतरराष्ट्रीय नाणेनिधीन पाकिस्तानाक निधी दिल्लो आसलो तरी ते खातीर खूबश्यो अटी घाल्यात.
पाकिस्तानांत म्हारगाय इतली वाडल्या की पाकिस्तानी नागरिकांक एक फावटीचें जेवण मेळप लेगीत कठीण जालां. म्हारगायेन लोक मेटाकुटेक आयल्यात. तातूंत भारतान सिंधू जल कबलात स्थगीत केल्ल्यान पाकिस्तानी नागरिकांक उदका खातीर वळवळे काडचे पडटले. जर भारतान ही जल कबलात पूर्ववत केली ना जाल्यार फुडारांत पाकिस्तानांत व्हड प्रमाणांत उदकाची समस्या निर्माण जावंक शकता. हाचेर उपाय म्हूण पाकिस्तानाच्या शरीफ सरकारान ग्रीन पाकिस्तान इनिशिएटिव्ह हो म्हत्वाकांक्षी प्रकल्प हातांत घेतला. सुमार साडेतीन हजार कोटी रुपयांचो हो प्रकल्प चीनाचे मजतीन पाकिस्तान उबो करतलो. ह्या प्रकल्पाक पाकिस्तानाची दुसरी हरीत क्रांती अशें म्हणटात.
ह्या प्रकल्पा खाला पाकिस्तानांतली चेलिस्तान रेंवटांतली सुमार 48 लाख एकर जमीन उदका खाला येतली. ते खातीर शेंकड्यांनी किलोमिटराचे स कानाल काडटले. ह्या प्रकल्पा कडेन पाकिस्तान सरकार ड्रीम प्रॉजेक्ट म्हूण पळयतात. पूण होच प्रकल्प आतां पाकिस्ताना खातीर तकलीफोड जाला. कारण ह्या प्रकलपान सिंध प्रांतात येवपी उदक पंजाब प्रांतात घुंवडायतले अशें सिंध प्रांतांतल्या लोकांक दिसता. आपल्या हक्काचें उदक पंजाब प्रांताक मेळपाचें आशिल्ल्यान सिंध प्रांतांतले नागरीक अस्वस्थ जाल्यात. हे अस्वस्थेंतल्यानूच थंयचे नागरीक रस्त्यार देंवून पाकिस्तान सरकारा आड आंदोलन करीत आसात.
भारत आनी बलुचिस्तान आर्मी मुखार हतबल जाल्ल्या शरीफ सरकारा मुखार ही नवी तकलीफोड उबी जाल्या. पाकिस्तानांतले सिंध प्रांतांतले लोक आतां सरकारा आड रस्त्यार देंवून आंदोलन करीत आसात. ह्या आंदोलनाक हिंसक वळण लेगीत लागलां. तिडकल्ल्या आंदोलकांनी सिंध प्रांतांतल्या गृहमंत्र्याच्या घराक उजो लायलो. ह्या वेळार जाल्ल्या फारपेटांत तीन नागरिकांक मरण आयलें. हें आंदोलन वाडतूच चल्लां. पाकिस्तान लश्कर आनी सरकारा मदीं पंजाबाचें वर्चस्व आसून तांचे सिंधाच्या विकासा कडेन वर्सा कणकणीं आडनदर जायत आशिल्ल्याची थंयच्या नागरिकांची कागाळ आसा. पाकिस्तान सरकार सिंध प्रांताचेर सेगीत अन्याय करीत आशिल्ल्याची भावना थंयच्या नागरिकांची जाल्या. ह्या अन्याया आड सिंध प्रांतातले नागरीक आवाज काडीत आसात.
इतलेंच न्हय जाल्यार ह्या आंदोलनांत सिंध प्रांतांतल्या नागरिकांनी स्वतंत्र सिंधू देशाची मागणी केल्या. ही मागणी आतांची न्हय जाल्यार फाटल्या कांय वर्सां सावन करीत आसात. पाकिस्तानांतल्या सिंध प्रांतात हिंदू धर्मांतले लोक व्हड प्रमाणांत रावतात. ह्या नागरिकांचेर फाटल्या कांय वर्सां सावन अन्याय सुरूच आसा. ही अन्यायाची माळ सोंपची आनी सिंध प्रांतातल्या हिंदू नागरिकांक तांचे अधिकार आनी हक्क मेळचे हे खातीर संवसारभरांतल्या ह्या आंदोलनाक तेंको मेळत आसा.
फाटल्या कांय काळांत पाकिस्तानांतल्या हिंदू बायलांचेर चड करून सिंधी हिंदू बायलां वेल्या अत्याचारांच्या घडणुकांनी सुमारा भायर वाड जाल्या. ह्या वाठारांतल्या चलयांक, बायलांक फटोवन, उबारून व्हरून सक्तीन तांचे धर्मांतर करतात. वाडट्या अत्याचाराक लागून थंयचे नागरीक व्हड प्रमाणांत त्रस्त जाल्यात. सेगीत सरकाराक विनंती करून लेगीत सरकार ताचे कडेन आडनदर करीत आशिल्ल्यान थंयचे नागरीक अस्वस्थ आशिल्ले. तातूंतच ह्या नव्या प्रकल्पाची भर पडिल्ल्यान थंयच्या नागरिकांची अस्वस्था आनीक वाडल्या. आपल्याचेर जावपी अन्याय पयस करपाचो आसत जाल्यार स्वतंत्र सिंधू देशा बगर पर्याय ना अशीच भावना थंयच्या नागरिकांची जाल्या, आनी तातूंतल्यानूच स्वतंत्र सिंधू देशाची मागणी केल्या.
फाटल्या वर्साच स्वतंत्र सिंधू देशाक भारत आनी अमेरिकेन तेंको दिवचो अशी विनंती केल्ली. हाचेर दोनूय देशांनी कसलीच प्रतिक्रिया दिवंक नासली तरी फुडारांत ह्या दोनूय देशांक आंदोलनकर्त्यांच्या ह्या मागणीची दखल घेवचीच पडटली, आनी जेन्ना हे दोनूय देश हे मागणेची दखल घेतले तेन्ना पाकिस्तानाचे आनीक कुडके जाल्ले आसतले.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
