भांगरभूंय | प्रतिनिधी
भांगरभूंय । प्रतिनिधी
पर्वरीः साळगांवच्या कोयर प्रकल्पांत दक्षीण गोंयांतलो कोयर हाडून ताचेर प्रक्रिया करपाक साळगांव मतदारसंघाचो आमदार केदार नायक हाणे विरोध केला. व्हो कोयर हाडपाचें बंद केलें ना जाल्यार साळगांव मतदारसंघातले लोक रस्त्यार बसून येरादारी आडायतले अशी शिटकावणी नायक हाणे सोमाराक कोयर प्रकल्पांत आयोजीत केल्ले जोड बसकेंत दिल्या. कोयर प्रकल्पा कडेन वचपी रस्या कुशीक कांय शाळा आसात. कोयर घेवन वचपी ट्रकांच्या आवाजाक लागून तांच्या अभ्यासाचेर परिणाम जाता. ताका लागून ट्रकांक वेळ थारावन दिवपाची मागणी नायक हाणे केल्या.
साळगांव, रईश मागुश, पिळर्ण, सांगोल्डा, कळंगुटे आनी कांदोळी पंचायत वांगड्यांची जोड बसका सोमाराक साळगांव कोयर प्रकल्पांत जाली. ह्या वेळार कळंगुटेचो आमदार मायकल लोबो, शिवोलेची आमदार डिलायला लोबो आनी साळगांवचो आमदार केदान नायक आनी साळगांव कोयर प्रकल्पाचो वेवस्थापकीय संचालक लेविन्सन मार्टिन्स आनी हिंदूस्तान वेस्ट ट्रिटमेंट प्लांचो संचालक गणेश कंडास्वामी हाजीर आशिल्लो.
मायकल लोबो, केदार नायक आनी कळंगुटेचो सरपंच जोसेफ सिक्वेरा हाणी साळगांव कोयर प्रकल्पा कडेन संबंदीत समस्या बसकेंत मांडल्यो. साळगांव कोयर प्रकल्पांत मडगांव, मुरगांव आनी फोडें पालिक वाठारांतलो कोयर हाडपाचें बंद करपाची सुचोवणी मायकल लोबो हाणे केली. दर दिसा सांजे 5 उपरांत प्रकल्पांतली घाण कळंगुटे आनी कांदोळी वाठारांत पातळटा. लोकांक घराचीं जनेलां उक्तीं करपाक मेळनात. कांय कडेन बायांतलें उदक प्रदूशीत जाला अशे ताणे सांगलें.
साळगांव प्रकल्पाची तांक दिसाक 250 मेट्रीक टन कोयराचेर प्रक्रिया करपाची आसा. सध्या 210 टन कोयराचेर दिसपट्टी प्रक्रिया करतात. पंचायतीनी कायद्यान कोयर वेगळो करून प्रकल्पांत धाडपाक जाय. मात तशें जायना अशें लेविन्सन मार्टिन्स हाणे सांगलें. आमदारांनी केल्ले मागणे प्रमाण मुरगांव, मडगांव आनी फोडें पालिका वाठारांतलो कोयर हाच्या उपरांत घेवचे नात अशेंय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
