भांगरभूंय | प्रतिनिधी
मडगांव, प्रतिनिधी: समाजाक उपेगी थारपी गजालींचेर संशोधन जावचें ह्या हेतान मडगांवां व्ही. एम. साळगांवकार कोंकणी संशोधन केंद्र सुरू केलां. हांतल्यान भास, साहित्य, संस्कृती अश्या गोंयां कडेन संबंदीत खंयच्याय विशयाचेर संशोधन करतले. हे खातीर पांच संशोधकांक संस्थे वतीन फेलोशीप दितले, अशी म्हायती संचालक उदय भेंब्रे हांणी दिली.
गोंयची जिणेशैली, भास, इतिहास, संस्कृती, कला हे विशीं खोलायेन वचून अभ्यास जावचो, हे खातीर गोंयच्या संशोधकांक उर्बा दिवपा खातीर साळगांवकार कोंकणी संशोधन केंद्राची स्थापना केल्ल्याचें तांणी फुडें सांगलें.
सत्त्याचो सोद घेवपाची वृत्ती सद्या उणी जायत चल्ल्या, अशें दिसून येता. ती वृत्ती कायम रावची असो यत्न चालू आसा. समाजाक बरें कितेंय मेळचे खातीर संशोधनाची गरज आसता. तांतल्यान समाजाक फायदो जावचो होच हेत आसा. कोंकणी संशोधन केंद्रांतल्यान समाजाक गरजेचें अशें दिवपा खातीर विद्यार्थ्यां मदीं संशोधनाची आवड निर्माण करप, अभ्यासकांक उर्बा दिवप, तांचे कडल्यान काम करून घेवप आनी तांच्या कामाक नामना दिवप अश्या सगळे तरेच्या कामांक प्राधान्य दितले. गोंयचो खंचोय विशय घेवन संशोधन करूं येता. हे खातीर संस्थेन अर्ज मागयल्यात. तांतल्या पांच संशोधकांक चडांत चड एक लाख रुपया मेरेनची फेलोशीप संशोधना खातीर दितले, अशें संचालक उदय भेंब्रे हांणी सांगलें.
हे विशीं चड म्हायती संस्थेच्या व्ही. एम. साळगांवकार कॉर्पो. प्रा. लि. च्या अधिकृत संकेतस्थळाचेर मेळटली, अशेंय तांणी सांगलें. गोंयची भास, संस्कृती आनी इतिहास संशोधना वरवीं लोकां मुखार येवचे खातीर संस्था यत्न करता, अशेंय तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
