भांगरभूंय | प्रतिनिधी
वाळपयंत दुचाकी, चार चाकी वाहनां चलोवपी 50 जाणांचेर कारवाय; बापायचेर गुन्यांव दाखल
वाळपय: दुचाकी आनी चारचाकी वाहनां चलोवपी सान पिरायेच्या चालकांचेर काल (बिरेस्तारा) वाळपय पुलिसांनी खर मोहीम सुरू केली. मेळिल्ले म्हायती प्रमाण सुमार 50 जाणांचेर कारवाय करून ही मोहीम सुरूच उरतली अशें पुलीस अधिकाऱ्यांनी स्पश्ट केलें. सान पिरायेच्या भुरग्यांच्या बापायचेरूय गुन्यांव दाखल केल्ल्याचें पुलिसांनी सांगलें.
हे विशींची म्हायती अशी की गोंयांत फाटल्या कांय दिसा सावन अपघाताचें सत्र वाडूंक लागलां. लायसन नासतना वाहनां चलोवप, तशेंच सान पिरायेच्या भुरग्या कडल्यान वाहनां चलोवपाच्या प्रकारांनी वाड जावंक लागिल्ल्यान अपघातांनी वाड जाल्या. हाका लागून मुख्यमंत्री डॉ. प्रमोद सावंत हांणी सान पिरायेच्या भुरग्यां कडेन आपलीं वाहनां दिवची न्हय अशी विनंती केल्ली. तरी लेगीत सान पिरायेचे भुरगे गाडयो चलयतना दिसून येताले. हाका लागून ही कारवाय हातांत घेतल्या अशें पुलिसांनी सांगलें.
काल (बिरेस्तारा) दीसभर वाळपय शाराच्या खूबशा सुवातींनी ही कारवाय केली. वाळपय सरकारी हॉस्पिटल वाठारांत हातांत घेतिल्ले मोहिमे खाला वट्ट 50 सान पिरायेच्या चालकांचेर कारवाय केल्या, आनी तांचे कडल्यान व्हड प्रमाणांत महसूल जप्त केला.
मोटर वाहन कायद्या प्रमाण तांच्या बापायचेर गुन्यांव दाखल केला आनी तांचे अटकेची कारवाय जातली अशें पुलिसांनी स्पश्ट केलें. अचकीत सुरू जाल्ले कारवायेक लागून लोकां मदीं एकूच खवदळ पडलो. मजगतीं, सान पिरायेच्या भुरग्यां कडल्यान गाडयो जप्त केल्यात आनी तांचेर कारवाय करतले अशें पुलीस अधिकाऱ्यांनी स्पश्ट केलें.
मजगतीं, ही कारवाय सुरू केले उपरांत लोकां मदीं एकूच खवदळ पडलो. खूबशा पालकांनी पुलिसांचेर राजकी चेपण हाडपाचो यत्न केलो. पूण ह्या चेपणा कडेन आडनदर करून पुलिसांनी खर कारवाय करपाचेर भर दिलो.
हे विशीं अदीक म्हायती दितना पुलीस निरिक्षक प्रज्योत फडते हांणी सांगलें की सान पिरायेच्या भुरग्यांनी गाडयो चलोवप नेमाचे भायर आसा. हाका लागून तांचेर कारवाय सुरू केल्या. हे कारवायेचें सत्र सुरूच उरतलें, आनी कोणाकूच सोडचे नात अशी शिटकावणी तांणी दिली.
सान पिरायेच्या भुरग्यांनी गाडी चलोवपा विरोधांत 10 हजार रुपया मेरेनच्या दंडाची तरतूद केल्या. तेच प्रमाण पालकांचेर अटकेची कारवाय करप गरजेचें आसा. ते प्रमाण ही कारवाय केल्या. फुडारांत अशे तरेची मोहीम सत्तरी म्हालांतल्या वेगळ्यावेगळ्या सुवातींनी हातांत घेतले. सान पिरायेच्या भुरग्यां कडेन पालकांनी गाडयो दिल्यार तांचेरूय खर कारवाय करतले अशें पुलीस निरिक्षक प्रज्योत फडते हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
