भांगरभूंय | प्रतिनिधी
भारताचे सात्विकसाईराज रेड्डी आनी चिराग शेट्टी हे दोट्टी गटांतले जोडयेन संवसारीक बॅडमिंटन वस्तादपण सर्तींतलें पदक निश्चीत केलें. तांणी संवसारीक क्रमवारींत दुसरे सुवातेर आशिल्ले जपानाचे ताकुरो होकी आनी युगो कोबायाशी हे जोडयेक उपांत्यपूर्व फेरयेंत हारयली.
संवसारीक क्रमवारींत सातवे सुवातेर आशिल्ले भारताचे हे जोडयेन राष्ट्रकूल खेळां सर्तींत भांगरा पदक जिखिल्लें.
भारताचे जोडयेन जपानाचे जोडयेक 24-22, 15-21 आनी 21-14 अशा तीन गेमींनी हारयलो. ही उमळशीक वाडोवपी मॅच 1 वर आनी 15 मिनटां मेरेन रंगली. विशेश गजाल म्हणल्यार सात्विकसाईराज आनी चिराग ही संवसारीक बॅडमिंटन वस्तादपण सर्तींत पदक जिखपी भारताची पयली दादल्याची जोडी थारली. जाल्यार दोट्टी गटांतलें वट्ट दुसरें पदक थारलें. हाचे आदीं बायलांच्या दोट्टी गटांत ज्वाला गुट्टा आनी अश्विनी पोनप्पा हे जोडयेन 2011त भारताक पयलें पदक जिखून दिल्लें.
ध्रुव-अर्जुन जोडी हारली
दादल्यांच्या दोट्टी गटांतले आनीक एके मॅचींत भारताचे ध्रुव कपिला-अर्जुन हे बिगरमानांकीत जोडयेक इंडोनेशियाचे मोहम्मद अहसान-हेंड्रा सेतियावान ह्या तिसऱ्या सिडा वयले जोडयेन 21-8, 21-14 अशा फरकांनी हारयली.
प्रणॉयाचेंय आव्हान सोंपलें
दादल्यांच्या एकोड्या गटांत भारताचो एच एस प्रणॉय हारलो. क्वॉर्टरफायनींतले मॅचींत ताका चीनाच्या झाओ जून पेंग कडल्यान 19-21, 21-16 आनी 21-18 अशा तीन गेमींनी हार घेवची पडली. हे हारी उपरांत भारताचें दादल्यांच्या एकोड्या गटांतलें आव्हान सोपलें. ताचे आदीं किदाम्बी श्रीकांत आनी लक्ष्य सेन हे लेगीत पयलींच सर्तींतल्यान भायर पडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
