भांगरभूंय | प्रतिनिधी
भलायकी मंत्र्याचें लेखी जापेंत नमूदः गोमॅकाँत दुयेंतींक जेवणाची वेवस्था
भांगरभूंय I प्रतिनिधी
पणजी : गोंय वैजकी म्हाविद्यालय (गोमॅकॉ), सुपरस्पेशालिटी विभाग आनी भलायकी खात्या खाला जेवणाची पुरवण करपी ‘सोडेक्सो’ कंपनीच्या सेवेचेर भलायकी खात्यान फाटल्या साडेतीन वर्सांत 27.61 कोटींचो खर्च केला, अशी म्हायती भलायकी मंत्री विश्वजीत राणे हांणी विधानसभेंतल्या लेखी प्रस्नाच्या जापेंतल्यान दिली.
आमदार विरेश बोरकार हांणी हे विशींचो प्रस्न विचारिल्लो. 2019 ते आतां मेरेन भलायकी खात्यान ‘सोडेक्सो’चे सेवेचेर कितलो खर्च केला हाची आंकडेवारीचो प्रस्न आमदार बोरकार हांणी लेखी केल्लो. ताका जाप दितना भलायकी मंत्री विश्वजीत राणे हांणी, गोमॅकाँतल्या सेवे खातीर कंपनीक 2019त सुमार 4.67 कोटी, 2020त 7.59 कोटी, 2021त 7.87 कोटी आनी अंदूं 2022 त आतां मेरेन सुमार 6.20 कोटी रुपया खर्च केल्यात. सुपरस्पशिालिटी ब्लॉकांतल्या सेवे खातीर कंपनीक 2021त सुमार 72.37 लाख आनी 2022 त आतां मेरेन सुमार 13.88 लाख रुपया दिल्यात. कोवीड काळांत 21 जून ते 7 ऑक्टोबर 2021 ह्या काळांत कोवीड दुयेंतींक जेवण दिल्ल्याचे सुमार 39.39 लाख रुपया कंपनीक फारीक केल्यात, अशें जापेंत नमूद केलां.
‘सोडेक्सो’ वतीन गोमॅकाँतल्या दुयेंतींक जे जेवण दितात, ते खातीर दरेकी दुयेंतीक दर दिसा 277 रुपया, जाल्यार भलायकी खात्या सयत कोवीड दुयेंती खातीर दरेकी दर दिसा 350 रुपया आकारतात, अशें मंत्री राणे हांणी लेखी जापेंत नमूद केलां.
जेवणाचो दर्जो तपासपाक यंत्रणा नेमल्या?
‘सोडेक्सो’ वतीन दिवपी जेवणाची गुणवत्ता तपासपाक भलायकी खात्या कडेन कितें यंत्रणा आसा, असो प्रस्न आमदार विरेश बोरकार हांणी विचारलो. ताचेर गोमॅकॉचे डीन डॉ. शिवानंद बांदेकार हांच्या मुखेलपणा खाला 6 जाणांची समिती नेमल्या. ते विशींची नोट मंत्री राणे हांणी जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
