भांगरभूंय | प्रतिनिधी
सद्याक सगळ्यो वाटो प्रयागराजचे दिकेन वतात. महाकुंभाच्या निमतान लोकांक संगमांत उडी मारून आपणालीं पातकां धुवपाचो योग मेळ्ळा. सगळे कशे नितळ जावन येतले. नवीं पातकां करूंक मागीर मेकळे. त्या निमतान प्रयागराजचो जाल्लो विकासूय सगळ्यांक पळोवंक मेळटलो. योगीच्या राज्यांत कसो विकास जाला तें कळटलेंच आनी असो विकास दर एका राज्यांत जावचो हीच अपेक्षा घेवन लोक परततले हातूंत दुबाव ना.
तसो फाटल्या साठ वर्सांत देशांत कसलोच विकास जालो ना म्हणपाचें सद्याचे राजकर्ते सांगत आसात. खंयचीय गजाल परत परत सांगली म्हणजे ताचेर विश्वास बसता. तें खरेंच दिसूंक लागता. तें खऱ्यांनीच खरें आसूंक जाय अशें ना. पूण परत परत कानार पडिल्ल्यान तें खरेंच शें दिसता. तशें प्रयागराज हालींचें. साठ वर्सां पयलीं नासलें हें नांव. तशें प्रयाग आसलें पूण इलाहाबादचो एक वाठार आसलें. ताचें योगीन प्रयागराज केलें. आतां फकत नांवूच बदल्लें काय विकासूय केलो तें पळोवपाची सगळ्यांक एक संद मेळ्ळ्या. खऱ्यांनीच विकास जाला आसत तर ताची तोखणायूच जावंक जाय.
तशेंय फाटल्या साठ वर्सांत देशांत कसलोच विकास जालो ना म्हणपाचें आत्र्या पयऱ्यान आमच्या कानार पडत आसा. देशांत विकास म्हणून जें कितें घडलां वा घडटा तें सगळें दोन हजार चौदा उपरांतूच म्हणपाचें सद्याक आमकां तरी खरें दिसूंक लागलां. कित्याक दिसचें ना? खंयचीय गजाल कानार पडत रावली म्हणजे ती खरी दिसतलीच. हांगाय तशेंच घडलां. जो कितें विकास जाला तो मोदी प्रधानमंत्री म्हणून सत्तेर येतकूच म्हणपाचें आतां सगळ्यांनीच मानून घेतलां. फाटल्या साठ वर्सांत जर विकास जालो तर तो फक्त नेहरू घराण्याचो. नेहरून फक्त स्वताचो सुवार्थ पळेलो आनी स्वताच्या कुटुंबाचेंच बरें केलें म्हणपाचें चित्र आमचे मुखार दवरलां. नेहरून कितें केलां तें सगळो संवसार जाणा. आपली सगळी संपत्ती देशाच्या नांवार करपी जर स्वताचो आनी स्वकियांचोच विचार करतालो म्हणपाचें कोणूय सांगता आसत तर ताचेर आनी कितें उलोवपाचें?
एके वटेन आयचे राज्यकर्ते म्हणटात फाटल्या साठ वर्सांत कांयच विकास जालो ना. आनी हें सांगपीच कांय प्रस्न मुखार उबे करतात. सद्याक सार्वजनीक क्षेत्रांतल्यो कंपनीं विकून वा तांचे समभाग विकून सरकार दुडू उबे करता त्यो कंपनीं कोणे आनी केन्ना उब्यो केल्यो काय? दोन हजार चौदा उपरांत सार्वजनीक क्षेत्रांत कितल्या उद्देगांची भर घाली आनी कितले उद्देग सरकारान विकले? सरकाराचीच म्हायती सांगता की फाटल्या पांच वर्सांत खंय केंद्र सरकारान सार्वजनीक क्षेत्रांतल्या कंपनींचे शेर्स विकून देड लाख कोटी जोडले. सरकारान जाहीर केल्ले म्हायती प्रमाण 2019-20 त सरकारान 50300 कोटीचे शेर्स विकले. 2020-21 त 32886 कोटीचे शेर्स विकले, 2020-22 त 13534 कोटी शेर्स विकून दुडू उबे केले. 2022-23 त 35294 कोटी जमयले जाल्यार 2023-24त 16507 कोटी उबे केले. ह्या वर्सा म्हणल्यार 2024-25 च्या डिसेंबर मेरेन 8624 कोटींचे शेर्स विकले.
आतां हे जे शेर्स विकले त्यो कंपनीं काय फाटल्या धा वर्सांत जल्माक येवंक नात. नेहरून जर फक्त सत्ता भोगली आनी आपणालो सुवार्थ पळेलो, देशा खातीर कांयच केलें ना, कसलीच उदरगत केली ना जाल्यार आयज सरकार विकता त्यो कंपनीं कोणे उब्यो केल्यो काय? पळेयात राज्यकर्ते जें कितें सांगता तें खरें काय फट तें हांगाच दिसता. स्वताचीं फटिंगपणां स्वताच वाऱ्यार घालतात. खरें तर काँग्रेसीन हें सगळें वाऱ्यार घालची गरज आसली. हो सगळो विकास फाटल्या साठ वर्सांचो, नेहरून हाचें मुळावण घाल्लें म्हणपाचें सत्ताधाऱ्यांक सांगूक जाय आसलें. पूण तांचोय सत्ताधारी कितें सांगतात ताचेर विस्वास बसला आसूंक जाय. अथवा हो विकास एका काळार काँग्रेसीन केल्लो हेंच ते विसरून गेल्या आसूंक जाय.
सद्याक तांचे लक्ष एकेच गजालीचेर आसा आनी तें म्हणल्यार राहूल गांधीक कसो तरी प्रधानमंत्र्याचे खुर्चेर बसोवप. काँग्रेसींत आनीक कोणूच लायक ना न्ही. म्हणटकूच तांचें लक्ष फक्त एकाच मनशाचेर लागलां. आनी तो कितें करता तें सगळेच पळेतात. राजकर्त्यांनी तर ताका ज्योकर करून उडयला. देशाच्या स्वातंत्र्या उपरांत महात्मा गांधीन काँग्रेसीचें काम सोंपलें आतां ती बरखास्त करुया अशी सुचोवणी केल्ली. पूण कांय जाणांक ती मान्य जाली ना. स्वातंत्र्य लढ्यांत जें कितें जोडिल्लें ताचो लाव घेवन सत्तेर येवचें ह्याच कारणाक लागून तेन्ना काँग्रेस बरखास्त जाली ना. त्या गांधीक जमलें ना तें हो गांधी करून दाखयतलो काय दिसता. दर वेंचणुके उपरांत अशेंच घडटलें म्हणपाचें चित्र स्पश्ट जायत वता आनी राहूल गांधीन जर आपणालो हट्ट सोडलो ना, प्रधानमंत्री जावपाचें सपन विसरलो ना जाल्यार लोक काँग्रेसीक विसरतले हें खात्रीन सांगू येता. पयर दिल्ली वेंचणुकेंत हेंच दाखयलां.
फाटल्या साठ वर्सांत कांयच विकास जालो ना ही एक व्हड फट म्हूण लोकांक पटोवन दिवपी फुडारी जो मेरेन काँग्रसीक मेळचो ना तो मेरेन हें सरकार सांगता ताचेर जनता दोळे धांपून विस्वास दवरतली. नेहरू, आंबेडकर, वल्लभभाय सारक्या तांकीचे फुडारी काँग्रेसींत तयार जावचे पडटले. नदर मारून पळेल्यार असले फुडारी ना म्हणूंक जावचे नात. पूण एका राहूलाक लागून तांचेर कोणाची नदर वचना. आनी हाकाच लागून काँग्रेसीचो विकास जायना. काँग्रेसीचो इतिहास आनी काँग्रेसीन केल्लो विकास खबर आशिल्ल्याच्या हातांत स्टेरींग येना तोवेर काँग्रेसीचें कांयच खरें म्हणूंक जावचें ना. आमकां राज्यकर्ते सांगता ताका हय सायबा म्हणचेंच पडटलें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
