भांगरभूंय | प्रतिनिधी
भांगरभूंय । प्रतिनिधी
केरी- सत्तरीः साखळेचे सांस्कृतीक उदरगतीक साखळे वाठारांतल्या सगल्या क्लबांनी एकठांय येवन आपलें योगदान दिवचें अशें मुख्यमंत्री डॉ प्रमोद सावंत हांणी मागलां. जवाहर देसाय सभाघरांत साखळे सम्राट क्लबाच्या अधिकार ग्रहण कार्यावळींत मुखेल सोयरे म्हणून ते उलयताले. ह्या वेळार मानाचो सोयरो म्हणून भीमराव देसाय, सम्राट इंटरनॅशनलाचो अध्यक्ष शैलेष बोरकार हाजीर आशिल्लो.
सुरवेक अस्तमतो अध्यक्ष कृष्णा गांवस हांणे प्रास्तावीक केलें. सचीव तनुजा शिरोडकारान अहवाल सादर केलो. क्लब अध्यक्ष म्हणून मोनाली बेतकीकार, सचीव म्हणून सुजय कोल्हापूरकार, भांडारी म्हणून कुष्ठा सातार्डेकारान सूत्रां स्विकारलीं. राधिका कामत सातोस्कार, आयपीपी कृष्णा गांवस, उपाध्यक्ष तनुजा शिरोडकार हांणी सोपूत घेतलो. सुनिता वेरेकार, शांताराम काणेकार, विजय सामंत, समृद्धी गणपुले, शुभदा सावयकार, अनिल वेर्णेकार हांची निवड वेगवेगळ्या समितींचेर केल्या. सचीन कर्पे, हेतल गांवकार आनी नम्रता नायक हाचे कडेन क्लबाची वेगवेगळी जापसालदारी दिल्या.
भाग्यरेखा गांवस आनी नव्या वांगड्यांक सोपूत दिलो. साखळे एक ल्हान शार आसलें तरी हांगा जायते क्लब आसात. तांणी एकठांय येवन साखळेची सांस्कृतीक उदरगत करपा खातीर एका कार्यावळ तयार करची अशें सांगून तांका लागता ती सगळी मजत सरकारा कडल्यान मेळटली अशें मुख्यमंत्री डॉ सावंत हांणी सांगलें. सम्राट इंटरनॅशनाचे गोंयांत 33 क्लब आसात ते एकठांय येवन सामाजीक वावर करतात अशी म्हायती शैलेष बोरकार हांणे दिली. क्लबान गोंय भायर आपल्या कामाचो विस्तार करपाची सूचोवणी भीमराव देसाय हांणी केली. राधिका कामत सातोस्कारान सूत्रसंचालन केलें जाल्यार सुजय कोल्हापूरकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
