भांगरभूंय | प्रतिनिधी
जनार्दन गोलतेकार हांची केली तोखणाय
म्हापशें: सडयें शिवोले रशियन जोडप्याचो पासपोर्ट आनी हेर साहित्य आशिल्ली बॅग जनार्दन गोलतेकार हांकां सांपली. ही बॅग सगल्या साहित्या सयत तांणी गोंयांतल्या रशियन सल्लागार अॅड. विक्रम वर्मा हांचे सुवादीन केली.
मंगळारा 12 वेर सांजवेळा कामा वयल्यान घरा परतून वतना गोलतेकार हांकां रस्त्याचे कुशीक पडिल्ली एक बॅग सांपडली. हे बॅगेंत रशियन जोडप्याचो पासपोर्ट, कांय रोख रक्कम, कपडे, बँक डेबीट, क्रेडीट आनी ट्रॅव्हल्स कार्डां आशिल्लीं.
हे बॅगेंत काणकोण आनी दाबोळी हांगासरल्या कांय हॉटेलांची व्हिजिटींग कार्डांय आशिल्लीं. जनार्दन गोलतेकार हांणी ह्या हॉटेलां कडेन संपर्क सादलो पूण हें रशियन जोडपें तांच्या हॉटेलार रावून दुसरी कडेन गेल्ल्याचें तांकां सांगलें. ताका लागून तांणी आपल्या इश्टां वतीन विदेशी पर्यटकांनी आपलो पासपोर्ट शेणिल्ल्याची कागाळ पुलिशेंत बी केल्या? हे विशींची चवकशी केली. पूण कागाळ नोंद जावंक नाशिल्ली.
निमाणें गोंयांतले रशियन सल्लागार अॅड. विक्रम वर्मा हे आशिल्ल्याचें गोलतेकार हांच्या एका इश्टान केल्लें चवकशेंत समजून आयलें. ते प्रमाण तांणी अॅड. वर्मा हांची तांचे कचेरेंत भेट घेतली आनी सांपडिल्ली बॅग सगल्या साहित्या सयत गोलतेकार हांणी तांचे कडेन सुपूर्द केली.
अॅड. वर्मा हांणी सदर पासपोर्टधारक रशियन जोडप्याक सोदपाचो यत्न करून बॅग तांचे सुवादीन करूं. गरज पडल्यार रशियन दुबावासाक सदर जोडप्याचो सोद घेवपाची विनंती करूं अशी हमी तांणी गोलतेकार हांकां दिली. तशेंच बॅग परतून केल्ले खातीर तांची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
