भांगरभूंय | प्रतिनिधी
सांता क्लॉज संवसारभरच्या ल्हान भुरग्यांक नातलांच्या आदल्या रातीं मेळटा. भुरग्यांक 24 डिसेंबराक खेळणीं, चॉकलेटी आनी हेर साबार तरेच्यो भेटवस्तू भेटयता असो क्रिस्ती लोकां मदीं समज आनी भावार्थ आसा. सांता क्लॉज हो मोगाळ, मायेस्त आनी विश्वासाचें पात्र जावन आसा. म्हज्या कंवळे पिरायेचेर भुरग्या मनार आपली वेगळी छाप मारपी, हो सांता क्लॉजच तर आशिल्लो. देखून सांता क्लॉज हो म्हाका आयज लेगीत आमच्याच घराब्यांतलो एक नात्यांतलो वांगडी कसो दिसता. इतलो प्रभाव ताचो आमचे जिणेंचेर घाल्लो.
सांत क्लॉज भुरगीं आनी भेटवण
आयज काल, 25 डिसेंबराक भेट वस्तू दिवपाचे प्रथेक बरोच नेट आयला. हो..हो..हो..असो आवाज करीत, लांबदीग धवें खाडाचो, तांबड्या लुगटाचे कपडे घातिल्लो, खांदार भेट वस्तूचो साक, हातांत क्रिसमस बॅल अश्या सांताक तुमी वळखतात आसतलेच. हरणाचे मोटारीचेर तो बसून झेतान येता. तो उत्तर ध्रुवाचेर रावता असो लोकांचो समज आसा. 19 व्या शेंकड्यांत अमेरिका आनी कॅनेडा देसांत सांता क्लॉजाचे खाशेलें रुप खूब फामाद जालें.
इतिहास आनी विकास
सांता क्लॉजाचें नांव सांत निकोलॉस ऑफ मायरा. ( 15 मार्स 270 – 06 देसेंब्र 343 ) रोमन राजवटींत ते मीस सांगतना नवलां करताले. तांणी पुराय आपली जीण जेजू क्रिस्त हांकां समर्पित केल्ली. तांकां निकलोस ऑफ वंडर वर्कर म्हूण पाचारतात. इतिहासकारांच्या मतान,- तांचो जल्म जेजू क्रिस्ताच्या मरणा उपरांत जालो अशेंय मानतात. तो पयस दोंगराळ सुवातेर रावतालो. खास करून नाताल परबे निमतान भुरग्यांक भेटवस्तू भेटयतालो. उपरांत तांणी जेजू क्रिस्ताक आपलो गुरू म्हूण स्विकारलो.
गरीबांचो इश्ट सांत निकोलॉस
सांत निकोलॉसाच्या उदारपणाची एक काणी खूब फामाद आसा. निकोलॉस हाका गरीबांक मजत करपाची आवड आसली. तो सदांच गरजेवंतांक तशेंच पिडेस्तांक मजत करपाक मुखार आसतालो. एक दीस, एका गरीब दयाळ मनशाक ताणें मजत केली. त्या दुबळ्या मनशाचे लागीं आपल्या तीन धुवांचें काजार करपाक दुडू नाशिल्ले. ही खबर सांत निकोलॉसाक कळ्ळी. ताणें लिपून गुपीत रितीन त्या तीन चलयांच्या मेयांत भांगरांच्या नाण्यांची पोती दवरली. तीं खुशालभरींत जालीं. ताचें काजार जालें. देखून आयज लेगीत ही प्रथा पाळटात. नातलांच्या रातीं भेटवस्तू मेळपाचे आशेन ल्हान भुरगीं आपल्या घरा जनेलांच्या वांरावांक मेय बांदून दवरतात.
सांता क्लॉजाचो गांव, रोवानियेमी – फिनलेंड
फिनलेंड रोवानियेमी गांवांत सांता क्लॉजाचो गांव म्हण दर्जो मेळ्ळा. ह्या गांवांत वर्सभर बर्फ पडटा. थंय सांता क्लॉजाचे नांवाची कचेरी आसा. धवें कपडे न्हेसप मुखेल कामगार करतात. आयज लेगीत कांय लोक सांता क्लॉजाचे नांवान पत्रां धाडटात. त्या कचेरेंत एक पत्रां वाचून तांकां योग्य जाप दिवपी, तांबडो भेस न्हेसलेलो सांता क्लॉज आसता. लोकांक थंय फोटो काडपाक कडक मनाय आसा. निदरलेंड आनी बेल्जियम देसांत सांता क्लॉजांत सिंटरक्लास ह्या नांवान वळख आसा. ताचें चड आनी चड फामादीक आशिल्लें गीत म्हणल्यार ; Dear old Santa, We Wish You a Marry Christmas’.
सांता क्लॉजाक कितलीं वर्सां?
ब्लॉग र्इ-मेल हांच्या मतान, सांता क्लॉज 2021 पर्यान 1,750 वर्सांचो जावन आसा. ताचो जल्म एका गांवांत 260 ते 280 ए.डी. मदीं जाल्लो अशें मानले जाल्यार लेगीत संत निकोलस नांवांच्या एका संताचे पसून सोदूक जाता. पातारा, जो जून तर्किचो एक भाग जावन आसा.
आजून लेगीत नातलांच्या आदल्या रातींक ऑस्ट्रेलियांत गाजर दवरतात. निदरलॅण्डांत बूट काडपाची चाल पाळटात. तशेंच तांदळाचें पोतें वा साकरेचें पोतें दारांच्या भायर दवरपाची परंपरा कडकसाणेन डॅनमार्क देसांत पाळटात. ह्यो प्रथा आजूनय लेगीत जित्यो-जिव्यो आसात. अशें आसलें तरीय आयच्या काळांत नातलांचो सांता क्लॉज जरी मुखेल भाग जालो तरीय बगर सांताचे नातलां अपूर्ण दिसतलीं काय?
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
