भांगरभूंय | प्रतिनिधी
इनास परेरा : पंचायत अधिकाऱ्यांचेर एफआयआर दाखल करपाचो न्यायालयाचो आदेश
भांगरभूंय । प्रतिनिधी
पणजी : सांताक्रुझ पंचायतीन मानायांच्या पगारा भितर गुड्डूलूसांव करून 24 लाखांचो घोटाळो केला. हे विशींचे कागाळाची दखल घेवंक नाशिल्ल्यान न्यायालयांत धांव घेवची पडली. आतां न्यायालयान भ्रश्टाचार विरोध पंगडाक (एसीबी) सांताक्रुझ पंचायतीच्या अधिकाऱ्यां आड एफआयआर नोंद करपाचो आदेश दिला, अशें सांताक्रुझ पंचायतीचे पंच वांगडी इनास परेरा हांणी सांगलें.
सांताक्रुझ पंचायतीन म्हयन्याक तीन लाखांचो भ्रश्टाचार चल्ला, अशी कागाळ पुराव्या सयत एसीबींत दाखल केल्ली. पूण एसबीन दखल घेवंक नाशिल्ल्यान आपल्याक न्यायालयांत वच्चो पडलो. न्यायालयांत वतकत एसबी निरिक्षका कडल्यान नोटीस आयली आनी पडटाळणी खातीर आपयलो. पांच दिसांनी ही कागाळ भायर मारली, अशें परेरा हांणी म्हणलें.
पंचायतीन भौशीक कामां खातीर मानाय हाडल्यात. 800 रुपयांच्या दीसवड्याच्या हिशोबान ह्या मानायांक म्हयन्याक 24,800 रुपया फारीक करपाचो पंचायतीन बसकेंत थाराव घेतिल्लो. जेन्ना आपणे तशेंच लोकांनी मानायांक म्हयन्याक कितलो दीसवडो दितात, अशें विचारलें तेन्ना तांकां म्हयन्याक 10 हजार पगार मेळटा अशी जाप दिली. हे खातीर उरिल्ले 14, 800 रुपया कोण खाता, असो प्रस्न इनास हांणी उपस्थीत केलो.
ह्या मानायांचे पगाराचे चेक आसात ते मानयांच्या नांवार न्हय जाल्यार भलताच्या कोणांच्या नांवान काडटात, जे कामूच करिनात. आपणे ह्या मानायांची कबुली दिवपी व्हिडीयो आनी हेर कागदपत्रां सयत पुरावो म्हूण दाखल केल्ले. ह्या मानायांक तशेंच कोणाच्या नांवार पयशे घेतल्यात तांकां आपोवन तांचीं खातीं तपासचीं, अशी आपणे कागाळ केल्ली, अशें इनास हांणी सांगलें.
हे कागाळीची दखल घेवंक नाशिल्ल्यान हे विशीं आपणे परतून सत्र न्यायालयांत याचिका दाखल केली. 8 ऑक्टोबराक न्यायालयान हे विशीं आदेश काडून एसीबीक सांताक्रुझ पंचायतीच्या अधिकाऱ्यांचेर एफआयआर नोंद करपाचो आदेश दिला आनी फुडली सुनावणी डिसेंबरांत दवरल्या, अशें इनास हांणी सांगलें. दर म्हयन्याक मानायांच्या पगारांत सुमार 3 लाख रुपयांचें गुड्डूलूसांव करून जानेवारी ते आतां मेरेन फाटल्या 8 म्हयन्यांत 24 लाखांचो घोटाळो जाला. हे तीन लाख कोणांक वताले हे सोदून काडप पुलिसांचें काम. हे पयशे लोकांचे, करदात्यांचे पयशे. जे दोशी आसात ते बंदखणींत वचून सांताक्रुझच्या लोकांक न्याय मेळपाक जाय. ज्या गरीब मानायांक नाडल्यात तांचे पयशे तांकां मेळपाक जाय, असो निश्चेव इनास हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
