भांगरभूंय | प्रतिनिधी
पणजी : सांतइस्तेव जुंव्या वयल्या आखाडो फेरी धक्यार शेनवारा रातीं घडिल्ले दुर्घटणेंत रेंट अ कार रातच्या काळखांत रस्त्याचो अदमास येवंक नाशिल्ल्यान सरळ न्हंयेंत गेल्ली. मजगतीं गाडयेंतले चलयेन वेळार गाडयेंतल्यान भायर येवन पेंवत आपलो जीव वाटयलो. पुलिसांनी केल्ले चवकशे मजगतीं गाडयेचो चालक बाशुदेव भंडारी (22) होय गाडयेंतल्यान भायर आयिल्ल्याचें हे तरणाटे चलयेन सांगलें. मात ताका पेंवपाक कळनाशिल्ल्यान तो बुडलो आसतलो असो अदमास आसा. सध्या पुलीस ताचो सोद घेतात.
सध्या पोरणें गोंयचे पुलीस न्हंयेचे देगेर झोपांनी कूड सोदपाचो यत्न करतात. दर्यादेग पुलिसूय पणजे वटेन आशिल्ल्या फेरयेच्या धक्या लागसारा सोद घेतात. सोमारा मुखार आयिल्ले म्हायती प्रमाण, बाशुदेव भंडारीचो परिवार मंगळारा गोंयांत पावतलो.
मजगतीं, आयतारा न्हंयेंत गेल्ली रेंट अ कार फेरी धक्या पसून सुमार 25 मिटर अंतराचेर उदका भितर आशिल्ली. दनपार मेरेन ती उदकांतल्यान भायर काडली. ह्या वेळार थळावे पुलीस, दर्यादेग पुलीस, नौदळ तशेंच उजो पालोवपी दळाची मजत घेतली. न्हंयेच्या पात्रांत सोद घेवन लेगीत बाशुदेव मेळूंक ना. मजगतीं नौदळान बचाव कार्य बंद केलां. हे विशीं मेळिल्ले म्हायती प्रमाण, हे रेंट अ कारचो शेनवारा रातीं एके चारचाकी गाडयेक मात्सो धपको बशिल्लो. उपरांत ते निळे गाडयेन रेंट अ कारचो फाटलाव केलो. तेन्ना भियेल्लो बाशुदेव मेळटा थंयच्यान वाट काडीत आखाड्यार पावलो. मुखा वयल्या रस्त्याचो अदमास कळूंक नाशिल्ल्यान गाडी थेट उदकांत गेली, अशी म्हायती वाटावल्ले ते चलयेन पुलिसांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
