सांग्यार जाली ‘आषाढ पांवळी’ कविता सादरीकरण कार्यावळ

भांगरभूंय | प्रतिनिधी

36 भुरग्यांनी केल्यो कविता सादर

पणजी: ‘आषाढ पांवळी’ ही कोंकणी पावसाळी कविता सादरीकरण कार्यावळ हालींच सांग्यार हायर सेकंडरी स्कुलांत जाली. शेणै गोंयबाब सेवा केंद्र, सांवड्डें, कुडचडें आनी सरकारी उच्च माध्यमीक विद्यालय, सांगें हांच्या जोड पालवान ही कार्यावळ आयोजीत केल्ली. कार्यावळीक विभागीय शिक्षण अधिकारी प्रा. साईरोज देसाय आनी तियात्रिस्त आनी बरोवपी आलेक्सीन फर्नांडीस हाजीर आशिल्ले. 

सुमार 36 भुरग्यांनी ह्या वेळार आपल्यो कविता सादर केल्यो. हातूंत दिपीका वरक, दीक्षा रेकडो आनी तृप्ती चव्हाण हांचो उत्कृश्ठ कविता सादर केल्ले खातीर भोवमान केलो. खासा आमंत्रीत साईशा शेट शिरोडकार आनी दुर्वेश गांवकर हांणी ह्या वेळार कविता सादर केल्यो.

मानेस्तांनी भुरग्यांक चडांत चड वाचन आनी भाशा शास्त्र समजून घेवन अभ्यास करपाची सुचवणी केली. 

सुरवातेक केंद्राचे अध्यक्ष मनोहर नायक हांणी येवकार दिलो, विठ्ठल सावंत आवदियेंकार हांणी प्रस्तावना केली. प्रियान्का नायक पेडणेंकार हांणी कवितेचें, साहित्यांतलें म्हत्व हाचे विचार मांडले. सोनम गोसावी हांणी पुराय कार्यावळीचें सुत्रनिवेदन केलें जाल्यार केंद्र सचीव मोहनदास सावंत देसाय हांणी उपकार मानले.

 कार्यावळीक रजनीकांत नायक, दिनेश नायक, राजेंद्र नायक, लुईस डिकोस्टा, ज्ञानेश्वर नायक, मेघशाम प्रभू, स्नेहा नायक, सदानंद खांडेकार हाजीर आशिल्ले.