भांगरभूंय | प्रतिनिधी
रगत सांडलें तरी आयआयटी जावपाक दिवचे नात: शेतकार
सांगें : आयआयटीचो कॅम्पस सांग्यार जावपाची घोशणा मुख्यमंत्र्यांनी केल्ली आसली तरी थळाव्या लोकांचो विरोध कायम आसा. लोकांच्या विरोधाक लागून आयआयटीचो मार्ग सोंपो ना, मात दिसांन दीस तो खर जायत आसा. रगत सांडलें तरी आयआयटी जावपाक दिवचे नात, अशी शिटकावणी काल (आयतारा) घेतिल्ले पत्रकार परिशदेंत शेतकारांनी दिल्या. ह्या वेळार सुमार 300 शेतकार हाजीर आशिल्ले.सरकारी जाग्याचेर लोकांनी अतिक्रमण केलां. अतिक्रमण केल्ले लोकूच विरोध करतात, अशें थळावे आमदार आनी मंत्री सुभाष फळदेसाय हांणी सांगलां. हाका लागून आतां नव्यान वाद सुरू जाला.
शेनवारा कोर्टाली हांगच्या लोकांनी प्रकल्पाक विरोध केल्लो. हाचे उपरांत आयतारा दांडो हांगा प्रकल्पाच्या विरोधांत सभा जाली. खंयचेय स्थितींत आयआयटी जावपाक दिवचे नात, अशी शिटकावणी शेतकारांनी दिल्या.
सांग्यार आयआयटी जावची म्हूण आदले आमदार प्रसाद गांवकार हांणी यत्न केल्ले. तेन्ना शेतकारांनी विरोध केल्लो. हाका लागून आयआयटी प्रकल्प मेळावली हांगा गेलो. मेळावलीक विरोध जाले उपरांत आतां परतून सांगेंचो विचार सुरू जाला. पयली विरोध जाल्लो, त्याच जाग्यार परतून आयआयटी कित्याक? असो प्रस्न शेतकारांनी केलो.
आयआयटी खातीर ज्या जाग्याचो विचार चलता थंय काजू, माड आनी हेर पिकां आसात. शेतकारांनी कश्ट करून हीं पिकां रोंयल्यांत. मंत्री सुभाष फळदेसाय हे स्वताच्या फायद्या खातीर सांग्यार आयआयटी हाडपाक सोदतात. आयआयटीचो शेतकार तशेंच थळाव्या लोकांक किदें लाव आसा? असो प्रस्न नंदा मापारी हांणी केलो. ही सरकारी जमीन आशिल्ल्याचो दावो आमदार सुभाष फळदेसाय करतात. सरकारी जागो आसा, जाल्यार पुलिसांच्या संरक्षणांत जाग्याचें मेजणी कित्याक जाता? लोकांक विस्वासांत घेनासताना पुलीस बळाचरे सर्वेक्षण चलता. शेतकार मेले तरी आयआयटी उबारपाक दिवचे नात, अशें नंदा मापारी हांणी सांगलें.
ह्या जाग्याचेर शेतां आनी भाटां आसात. कपेल आसा. मसंडभूंय आसा. सैम पेड्डेर करून आनी शेतकारांच्या पोटार पांय दिवन आयआयटी करपाचो येत्न कित्याक? असो प्रस्न जोजफ फर्नांडीस हांणी केलो.
आयआयटीच्या जाग्यार उदकाचें स्रोत आसा. ह्या जाग्याचेर गोरवां पोट भरतात. सद्या 300 लोकांचो विरोध आसलो, तरी हाचे मुखार हजारांनी लोक विरोध करपाक एकठांय येतले, अशें कोस्तांव मास्कारेन्हास हांणी सांगलें. आयआयटी खातीर ज्या जाग्याची निवड जाल्या, थंय आमचो जल्म जालो. आमदार सुभाष फळदेसाय हाका ह्या जाग्या विशीं कसलीच म्हायती ना. ताचो बंगलो केप्यां आसा अशें कोस्ताव फर्नांडीस हांणी सांगलें.
कार्लोस कार्वाल्हो, शांतो गावकार, फुलोमेन डिकॉस्ता हांणी आपले विचार मांडले. नाका नाका, आयआयटी नाका, आमची जमीन आमका जाय, आमची शेतां आमका जाय अशो घोशणा ह्या वेळार दिल्यो.
अतिक्रमण केल्ल्या लोकांचोच विरोधः सुभाष
ज्या जाग्यार आयआयटी जाता तो सरकारी जागो आसा. जाग्याची कागदपत्रां सारकी आसात. काय लोकांनी जाग्याचेर अतिक्रमण केलां. अतिक्रमण करून वेवसाय सुरू केल्यात. कांय जाणांनी शेड बांदून दुसऱ्याक भाड्यान दिल्यात. जागो नांवार नासताना ते भाडें घेतात. अतिक्रमण करपी लोक विरोध करपाक मुखार आसात. हेच लोक हेर लोकांक भडकायतात. विरोध करपी लोकांची समजूत काडपाचो यत्न जातलो. सरकारी जागो आशिल्ल्यान कायदेशीर कारवाय करपाचो मार्ग मेकळो आसा. आयआयटी खातीर 9.5 लाख चौखण मिटर जागेची गरज आशिल्ली. संग्यार 7.5 लाख चौखण मिटर जागो आसा. ह्या जाग्याचेर आयआयटी जातली अशें समाज कल्याण मंत्री आनी सांगेंचे आमदार सुभाष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
