सांगेकारांक आयआयटी नाका जाल्यारतो शिरोड्या व्हरतांः सुभाष शिरोडकार

भांगरभूंय | प्रतिनिधी

भांगरभूंय । प्रतिनिधी
सांगेंः सांग्यांतल्या शेतकारांक आयआयटी शिक्षणीक प्रकल्प नाका जाल्यार तो शिरोडें मतदारसंघात व्हरपाची तयारी शिरोड्याचो आमदार आनी उदकास्रोत मंत्री सुभाष शिरोडकार हांणी दाखयल्या. आयआयटी प्रकल्प सांग्यार हाडपा खातीर पेंगट बांदपी सांग्यांचो आमदार आनी समाज कल्याण मंत्री सुभाष फळदेसाय हाचे हाजेरींत मळकर्णे हांगा ” जल ही जीवन है” हे कार्यावळींत उलयतना शिरोडकार हांणी आयआयटी प्रकल्प शिरोड्या व्हरपाची आपली तयारी आसा अशें जाहीर केलें.
आयआयटी प्रकल्प सांग्यार हाडपाक सांगें तालुक्यांतल्या लोकांचो आशिल्लो विरोध आतां उक्ताडार येवपाक लागला. अशें आसतनाय सुभाष फळदेसाय  व्हो प्रकल्प सांग्यारूच जातलो अशें ठामपणान सांगतात. हे फाटभुंयेर शिरोडकार हांणी जें कितें सांगलां तांका म्हत्व आयलां. तशेंच सांग्यार आयआयटी प्रकल्प उबारपा विशीं डॉ प्रमोद सांवत मंत्रिमंडळांतल्या मंत्र्यां मदींच एकमत ना हें आतां सामकार येवपाक लागलां. आयआयटी प्रकल्प सांग्यातल्या सैमाक बादिकारक थारतलो तशेंच आपल्या पूर्वजांनी वसयल्ले जमनींत हो प्रकल्प उबारपाक साबार शेतकारांचो विरोध आसा हाची दखल घेवन सुभाष शिरोडकार हांणी व्हो प्रकल्प आपल्या शिरोडें मतदारसंघात व्हरपाची तयारी दाखयल्या, ताका सांग्यांतल्या आयआयटी विरोधकांनी येवकार दिला.
साळावली धरणग्रस्तांनी तांका दिल्ले 10 हजार चौखण जमनींत  कसली तरी  लागवड करची. तांणी ती केली ना जाल्यार  सध्या  ए वर्गांत आशिल्ले हे जमनीचें वर्गीकरण आपूण बी वर्गांत करचो ना अशीय शिटकावणी शिरोडकार हांणी धरणग्रस्तांक दिल्या. साळावली धरण जाल्या उपरांत शिंपणावळी खातीर उदक मेळटा त्या वाठारांले शेतकार आपली शेंतां कसताले. मात हालींच्या वर्सांत तांणी तें बंद केलां. आपले जमनीत पिकावळी खाला हाडची हे खातीर तांकां जाय त्यो सुविधा उपलब्द करून दिवपाक उदकास्रोत खातें तयार आसा अशें शिरोडकार हांणी सांगलें.
शेतां खातीर उदक मेळटा जाल्यार शेतां लागवडी खाला हाडप ही दरेका शेतकाराची लागणूक आसा. जे कोण शेतां रोयनांत ताका ते खातीर तयार करपाचें काम उदकास्रोत खात्याच्या अधिकाऱ्यांक करपाक सांगलां अशी म्हायती तांणी दिली. जल ही जीवन कार्यावळीक सुभा, चंद्रा, अभियंतो सालेलकार, सांग्याची विभागीय कृशी अधिकारी मीलन गांवकार, सांगें तालुक्यांतल्या पंचायतीचे सरपंच आनी उपसरपंच हाजीर आशिल्ले.
साळावली धरणग्रस्तांनी दक्षीण गोंयांतल्या लोकांक पियेवपा खातीर आनी शेतां रोवपा खातीर उदक मेळचें हे खातीर व्हडलो त्याग केलो. मात धरण लागीं आसून लेगीत ते रावतात त्या वाठारांत पियेवपाक आनी शेतां रोवपाक उदक मेळना ही वस्तुस्थिती आसा अशें सागून तांकां तें मेळचें हे खातीर यत्न करपाचें उतर सुभाष फळदेसाय हांणी कार्यावळींत उलयतना दिलें. शिरवयच्यान नेत्रावळी मेरेन तशेंच वालकिणी, भाटी, वाडें हांका उदका पुरवण करपा खातीर पायपलायन व्हरतले अशें तांणी सांगलें. सरकारी जमनीचो उपेग सरकारी प्रकल्पां खातीर जावपाक जाय अशें तांणी आयआयटीचो उल्लेख करनास्तना सांगलें. उगें हांगा 16 हजार चोखण मीटर सुवातेंत जावपी कुणबी व्हिलेज आनी हस्तकला दालन प्रकल्पा वरवीं 500 तें 600 लोकांक रोजगार मेळटलो अशें तांणी सांगलें. सांगे तालुक्यांत दूद उत्पादन व्हडा प्रमाणांत जाता ते खातीर दक्षीण गोंयां खातीर व्हेटरनरी हॉस्पिटल बांदपा खातीर गोरवां सांबाळ खात्यान जमीन घेतल्या अशी म्हायती तांणी दिली.
जल ही जीवन कार्यावळींत सुरेश वेळीप, दिलीप नायक, लक्ष्मण गांवकार, रमेश गांवकार, मिनिनो ग्रासियश ह्या शेतकारांचो भोवमान केलो. मळकर्णेचो सरपंच राजेश गांवकार हांणी सुरवेक सगल्यांक येवकार दिलो.