भांगरभूंय | प्रतिनिधी
वाडीव घरपटीक लागून मंत्री सुभाष फळदेसाय हांचे कडेन वाद
भांगरभूंय । प्रतिनिधी
सांगें: सांगें पालिकेचे बसकेंत पार्कींग, भुरग्यांची बाग आनी वाडयिल्ली घरपटी ह्या विशयांचेर नगरसेवकांनी एकामेकांक बोटां दाखोवन आरोप केले. ताका लागून नगरसेवकां मदीं पेटलें. असो प्रसंग पयलेच खेपे सांगें पालिकेंत घडलो.
सांगें पालिकेंत धा प्रभाग आसात. पूण ह्या धा प्रभागांतल्या मेजक्याच प्रभागांनी इल्ली उदरगत जाल्ली दिश्टी पडटा. उदरगतीच्या कामांत ही पालिका खूब फाटीं आसा. अशें आसून लेगीत नगरसेवक एकामेकां बोटां दाखोवन झगडीं केल्ल्यान सांग्यार एक वेगळेंच वातावरण तयार जालां. हे बसकेक थळावे आमदार तशेंच समाज कल्याण मंत्री सुभाष फळदेसाय हाजीर आशिल्ले.
नगरपालिके मुखार आशिल्ली भुरग्यांचे बागेची दुरुस्ती करून ती भुरग्यांक खेळपा खातीर दिवची, अशी मागणी नगरसेवक संगमेश्वर नायक हांणी बसकेंत केली. त्या वेळार चार नगरसेवकांनी भुरग्यांचे बागेक विरोध केलो आनी ते सुवातेचेर पे पार्कींग करपाची मागणी केली. एक गट भुरग्यांची बाग कित्याक असो प्रस्न करतालो जाल्यार दुसरो गट पे पार्किंगाची गरज कित्याक असो प्रस्न करतालो. ह्या विशयाचेर बसका खूब वेळ तापली. ते उपरांत नगराध्यक्ष प्रिती नायक हांणी भुरग्यांची बाग कोणा कोणाक जाय तांणी हात वयर करचो, अशें सुचयलें. त्या वेळार 10 मदल्या 6 जाणांनी हात वयर केले जाल्यार चार नगरसेवकांनी पे पार्किंगाची मागणी लावन धरली.
खासदार फ्रान्सीस सार्दिन हांणी 10 वर्सां आदीं सांगें शारांत सीसीटीव्ही कॅमेरा बसयिल्ले. तांची योग्य देखरेख जावंक नाशिल्ल्यान ते नादुरुस्त जाल्यात. ताची देखरेख कोणे करपाची, असो प्रस्न मॅश्यू डिकॉस्टा हांणी केलो. तशेंच सगळ्या प्रभागांनी सीसीटीव्ही कॅमेरा बसोवचे, अशी मागणी केली.
वाडयिल्ले घरपटीचो विशय लेगीत मॅश्यू डिकॉस्टा हांणी लावन धरलो. त्या वेळार जाहीरनाम्यांत दिल्लीं सगळींच आस्वासनां पुराय करपाक मेळना अशें मंत्री फळदेसाय हांणी सांगलें. ते उपरांत मॅश्यू आनी मंत्री फळदेसाय हांचे मदीं बरेंच पेटलें. ह्या वेळार उपनगराध्यक्ष कॅरज क्रूझ हांणी सांगलें, आयज मेरेन पालिकेंत 75 टक्के लोकांनी घरपटी फारीक केल्या. ताका लागून हो विशय हांगाच सोंपता. पालिका वाठारांत कोयर एकठांय करपा कातीर पालिका कंत्राटदार लोकां कडल्यान 365 दिसांचे पयशे घेता, पूण कोयर एकठांय करतना आयतारा सुटी घेतात. दिसपट्टो कोयर एकठांय करचो, असो थाराव ह्या वेळार मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
