भांगरभूंय | प्रतिनिधी
भांगरभूंय । प्रतिनिधी
सांगेः सांग्यार जावपी आयआयटीक वास्कोचो समाज वावुरपी शंकर पोळजी हांणी आपलो तेंको जाहीर केला. सांग्यार आयआयटी प्रकल्प उबारपाचो निर्णय सरकान रद्द करना तो मेरेन आपूण प्रकल्पाक विरोध करपी सांग्यांतल्या शेतकारां वांगडा आसतलों अशें तांणी जाहीर केलां. सैम पिड्ड्यार करून आयआयटी हाडपाक फुडें सरल्लें भाजपा सरकार तशेंच थळावो आमदाराचो तांणी निशेध केला.
शकंर पोळजी हांणी फाटल्या 44 दिसां सावन दांडो- सांगें हागा आयआयटी आड निदर्शना करपी लोकांची भेट घेतली. शेतकार आनी साबार लोकांचो विरोध आसतना सांग्यार आयआयटी प्रकल्प हाडपाचो सरकाराचो निर्णय सारको ना. सरकारा सद्या बेजापसालदारपणान निर्णय घेवपाक लागलां, तें बंद जावपाक जाय अशें पोळजी हांणी सांगलें.
गोंयांतले सध्याचे राजकारण आपल्या सुवार्था खातीर गोंय काबार करपाक सोदतात असो आरोप महेंद्र नायक हांणी केला. आयआयटी जाल्यार पुराय सांगें तालुक्याक वायटी लागतली अशें सांगतना लोकांक जाय तशें सरकारान काम करपाक जाय. आयआयटीचो सांगें तालुक्यांतल्या लोकांक कुस्कुटाचोय फायदो ना. लोकांच्या माथ्यार हो प्रकल्प सरकारा कित्याक मारपाक सोदता, असो प्रश्न तांणी विचारला.
सैम मातयेभरवण करून आयआयटी हाडून शेतकारांक उबंतर उडोवप हें सामके चुकीचें, थळावो आमदार सुभाष फळदेसाय मनमानी करता ताचें पानवळ ताकां भोगचें पडटलें अशें अँथनी डिसिल्वा हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
