भांगरभूंय | प्रतिनिधी
अमीत पाटकार हांची शिटकावणी; डीजीपीन गुन्यांव दाखल करचो
पणजी: मुख्यमंत्री डॉ. प्रमोद सावंत हांच्या फुडारपणा खाला गोंयच्या सामको असंवेदनशील आनी शेतकार विरोधी भाजपा सरकारान शेळ-मेळावलीच्या शेतकारांनी आपल्यो शेतजमनी वाटावपा खातीर केल्ल्या आंदोलनांतल्यान धडो घेवंक नाशिल्ल्याचें दिसून येता. आपली सुपीक जमीन वाटावपा खातीर संघर्श करपी सांगेंच्या शेतकारांचे आंदोलन चिड्डून उडोवपा खातीर धमक्यो दितात. शेतकारांच्या भावना कडेन खेळूं नाकात अशी शिटकावणी हांव मुख्यमंत्र्याक दितां. कश्टकरी शेतकार पेटून उठल्यार शेळ-मेळावलीची पुनरावृत्ती जातली अशी खर शिटकावणी काँग्रेस अध्यक्ष अमीत पाटकार हांणी दिल्या.
समाज कल्याण मंत्री सुभाष फळदेसाय हांणी सांग्यार आंदोलन थांबोवपाच्या शेतकारांक दिल्ले शिटकावणीचेर प्रतिक्रिया दितना पाटकार हांणी म्हणलें, सांगेंच्या शेतकारांक तेंको दिवपा खातीर काँग्रेस पक्ष गोंयभरच्यान लोकांक घेवन येतलो आनी शेतकारांचे हीत राखतलो.
आमच्या पक्षान सरकाराक केरी-सावयवेऱ्यां प्रस्तापीत आयआयटी खातीर उपलब्ध आशिल्ली जमीन वापरपाची सुचोवणी केल्ली जी हाचे पयलीं नायलॉन-66 प्रकल्पाक दिल्ली. एसईझॅड प्रवर्तकां कडल्यान परतून घेतिल्ली जमीन आयआयटी स्थापन करपा खातीर वापरची अशी विनंतीय आमी सरकाराक केल्ली. थळावें सरकार शेतकारांचो आवाज चिड्डुवपा खातीर आनी प्रधानमंत्री नरेंद्र मोदी हांचो अजेंडा मुखार व्हरपा खातीर शेता खातीर उपेगी आशिल्ल्यो जमनी काँक्रीटाच्या रानांत रुपांतर करपा खातीर तयार आशिल्ल्याचें दिसून येता अशें अमीत पाटकारान म्हणलें.
समाज कल्याण मंत्र्यान तांचोच मतदारसंघ आशिल्ल्या सांग्या वयल्या शेतकारांक धमकावपी शिटकावणी वाचून म्हाका अजाप दिसलें. विधानसभेचें अधिवेशन सुरू आसतना ही धमकी दिवप ही खूब हुस्क्याची गजाल. मंत्र्यान दिल्ल्या धमकीची डीजीपीन गंभीरतायेन दखल घेवची आनी धमकी दिवपी उलोवपां केल्ल्यान गोंयांत कायदो आनी सुवेवस्था इबाडूंक शकता म्हूण तांचेर ताकतिकेन गुन्यांव दाखल करचो अशी मागणी अमीत पाटकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
