भांगरभूंय | प्रतिनिधी
केरी-सत्तरी: जण एकलो भारतीय तनान आनी मनान नितळ जालो जाल्यार आपसूक पुराय भारत देश नितळ जातलो अशें चोडण लायन्स क्लबाचे अध्यक्ष आग्नेलो सिल्वा हांणी म्हणलें. ते सांखळी कोंकणी सेवा केंद्रान आयोजीत केल्ल्या 6 व्या ‘उमाळो’ उपक्रमांत मुखेल उलोवपी ह्या नात्यान उलयताले. ह्या वेळार योगगुरू शांताराम काणेकार ह्या सुवाळ्याक मुखेल सोयरे म्हूण हाजीर आसले.
काणेकार हांणी, तरेकवार कार्यावळी घडोवन हाडपी कोंकणी सेवा केंद्र संस्थेची तुस्त केली आनी तिका येस आंवडेलें.
केंद्राचे अध्यक्ष राजन शेट्ये हांणी आपल्या येवकाराच्या उलोवपांत ‘उमाळे’ उपक्रमाचें म्हत्व सांगलें. ह्या वेळार तांणी माचये वेल्या दोगांय मानेस्तांची सभाघराक वळख करून दिली.
पुराय कार्यावळीचें सुत्रसंचालन अनुपा वेरेंकारान केलें. समीर प्रभून सोयऱ्यांक फुलातुरे भेटयले. जाल्यार अनील वेर्णेंकार हांणी तांकां यादस्तिकां भेटयलीं.
कार्यावळींत सुरवेक सगले जाण एक मिनीट शांतीकायेन उबे रावन हालींच अंतरिल्ले केंद्राचे संस्थापक अध्यक्ष सर्गेस्त अशोक काणेकार हांकां आर्गां ओंपलीं. सचीव प्रा. रघुदास तारी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
