भांगरभूंय | प्रतिनिधी
मुख्यमंत्रीय जाले वांटेकार; केंद्रांत परतून मोदी हांचेंच सरकार: डॉ. सावंत
दिवचल: विधानसभा वेंचणुकेंत तीन राज्यांत विक्रमी जैत मेळयिल्ले खातीर काल (आयतारा) सांखळे मुख्यमंत्री डॉ. प्रमोद सावंत हांचे हाजिरेंत शेंकड्यांनी कार्यकर्त्यांनी जैत मनयलें.
ह्या वेळार भाजपाचे अध्यक्ष गोपाळ सुर्लकार, नगरसेवक, सरपंच, पंच, कार्यकर्ते तशेंच आमदार डॉ. चंद्रकांत शेट्ये बी हाजीर आशिल्ले. ह्या वेळार मिठाय वांटून, फोग लावन जैत मनयलें.
देशांत प्रधानमंत्री नरेंद्र मोदीच सर्वोत्तम आशिल्ल्याचें सिद्ध जालां, आनी आतां 2024 वर्सा जावपी लोकसभा वेंचणुकेंत भाजपाचें विक्रमी भोवमताचें सरकार स्थापन जातलें. काँग्रेसीक मातयेभरवण करून, भाजपान फाटल्या णव वर्सांत दिल्लें योगदान, केल्लीं कामां हाचो मतदारांनी आदर करून भाजपाक व्हड येस मेळोवन दिलां अशें मुख्यमंत्री डॉ. प्रमोद सावंत हांणी म्हणलें.
भाजपाची शिस्तबद्द प्रचार रणतिनी, जेपी नड्डा, अमीत शाह बी हांणी आंखिल्ली रणनिती आनी भाजपान केल्लीं कामां आनी दिल्लें योगदान हाचें हें जैत आशिल्ल्याचें मुख्यमंत्री डॉ. प्रमोद सावंत हांणी सांगलें.
ह्या वेळार दिवचलचे आमदार डॉ. चंद्रकांत शेट्ये हांणी मुख्यमंत्री डॉ. प्रमोद सावंत हांकां मिठाय भरोवन जैताच्यो शुभेत्सा दिल्यो.
भाजपाक देशांत मोटे येस फावो जालां. लोकसभा वेंचणुकेंत परतून एकदां मोदी हांच्या फुडारपणाक पसंती दिवपाचो निश्चेव मतदारांनी केला अशें डॉ. चंद्रकांत शेट्ये हांणी सांगलें.
ह्या वेळार कार्यकर्त्यांनी व्हडा उमेदीन जैत मनयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
