भांगरभूंय | प्रतिनिधी
वास्को : सांकवाळच्या पिकॉक व्हॅलीचे मेकळे सुवातेंत मुरगांव म्हाल नागरी पुरवण आनी गिरायक वेव्हार विभागाचे सहाय्यक संचालक तुळशीदास दाबोळकार आनी घोळट्या पंगडान मंगळारा 1 जुलयाक धाड घातली. हे धाडींत सात गाडयो आनी एक हजार घरगुती आनी वेवसायीक गॅस सिलिंडर ताब्यांत घेतले. ह्या वेळार दाबोळकार हांणी रितसर कागाळ केले उपरांत वेर्णें पुलिसांनी त्या गाडयो आनी सिलिंडर जप्त केले. ह्या प्रकरणांत भारतीय न्याय संहिता 2023 च्या विवीध कलमा खाला गुन्यांव दाखल केलो. ह्या प्रकरणांत वेर्णें पुलीस चवकशी करतात.
सांकवाळच्या पिकॉक व्हॅलीचे मेकळे सुवातेंत कांय गाडयो उब्यो आसात. तातूंतल्या सिलिंडर चडयतात – देंवयतात अशी म्हायती कोणेतरी मोबायल फोना वयल्यान नागरी पुरवण आनी गिरायक वेव्हार खात्याच्या पणजेच्या मुख्य कार्यालयाक दिली. हे संबंदांतली म्हायती नागरी पुरवण खात्याच्या वास्को विभागाक दिली. ते उपरांत तांणी येवन थंय आशिल्ले सिलिंडर व्हरपी दोन व्हड ट्रक, चार पिकअपी तशेंच अज्ञाताची गाडी ताब्यांत घेतली. घोळटो पंगड येता तें पळोवन थंय काम करपी कामगारांनी आनी कांय चालकांनी थंयच्यान पळ काडलो. तरी लेगीत दोन चालक हाताक मेळ्ळे. घोळट्या पंगडाक थंय कांय सिलिंडरांचें वजन उणें सांपडलें. वेर्णें पुलिसांनी ह्या प्रकरणांत पंचनामो करून त्यो गाडयो आनी सिलिंडर जप्त केले. ह्या प्रकरणांत वेर्णें पुलीस स्टेशनाचे निरिक्षक आनंद शिरोडकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
