भांगरभूंय | प्रतिनिधी
संबंदितां आड कागाळ नोंद, कामगारांनी काडलो पळ
सांकवाळे घरगुती गॅस सिलिंडराची पुरवण करतना गिरायकांक उण्यां वजनाचे सिलिंडर दिवपाचो प्रकार उक्ताडार आयला. गॅस सिलिंडराची पुरवण करपी कामगारांक हे विशीं जाप विचारल्यार तांणी गॅस गळटी जाल्ल्यान वजन उणें जाल्ल्याचो दावो केलो. पूण गिरायकांनी हे विशीं संबंदींत अधिकाऱ्यांक कळीत केले. आपणा विरोधांत कागाळ केल्ल्याचे कळटकूच सिलिंडर टेम्पो चालक, वाहक आनी हेर दोन कामगारांनी थंयच्यान पळ काडलो.
ह्या प्रकरणांत संबंदींत अधिकाऱ्यांनी घडणूक सुवातेर येवन सिलिंडराच्या वजनाची छाननी केली.
गॅस सिलिंडराचें सील काडून गॅसची चोरी करपाचे प्रकार वाडपाक लागल्यात. गिरायकांक उण्या वजनाचे गॅस सिलिंडर मेळूंक लागिल्ल्यान तांणी सादूर रावपाक जाय.
ही घडणूक सांकवाळे घडल्या. सोमारा सकाळीं 8.30 वरांचेर गॅस सिलिंडर टेम्पो आयले उपरांत गिरायकांक सिलिंडर वितरीत दिले. पूण सिलिंडराच्या वजना विशीं दुबाव आयिल्ल्यान तांणी ताचे वजन केल्यार ताका गॅस आनी सिलिंडराचें वजन 26 किलोग्रॅम मेळ्ळे. ते उपरांत तांणी आनीक एका गॅस सिलिंडराचे वजन केल्यार ते 30 किलोग्रॅम मेळ्ळे. उपरांत तांणी टेम्पोतल्या सगल्याच गॅस सिलिंडराचे वजन केले उपरांत चोरी उक्ताडार आयली.
हे विशीं कामगारांक विचारल्यार तांणी गॅस गळटी जाल्ल्यान वजन उणें जाल्ल्याचो दावो केलो. उपरांत लोकांनी संबंदींत अधिकाऱ्यांक कळीत केले. अापली चोरी उक्ताडार आयिल्ल्याचे कळ्ळे उपरांत टेम्पो चालक आनी कामगारांनी थंयच्यान पळ काडलो.
ह्या प्रकारा विशीं नागरिकांनी तिडक उक्तावन संबंदितांचेर कारवायेची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
