भांगरभूंय | प्रतिनिधी
सांकवाळकारांचे बसकेंत मानेस्तांचो उलो
वास्को, प्रतिनिधी: सावळफोंड- सांकवाळे जावपी मेगा हावसिंग प्रकल्पाक लागून गांवांत समस्या निर्माण जातल्यो. पर्यावरणाचेर व्हड परिणाम जातलो. तशेंच दोंगर कापून मदींच बांदतात त्या ह्या प्रकल्पाक लागून वायनाड भशेन परिस्थिती निर्माण जावपाचो भंय आसा. ताका लागून ह्या प्रकल्पाक हांगाच्यान भायर मारपाक मुखार सरात असो उलो आमदार, सांकवाळेचे कांय पंच, एनजीओ कार्यकर्ते, थळावे हांणी आयतारा घेतिल्ले बसकेंत मारलो.
आपूण सामान्य नागरिकां वांगडा आसा. हो प्रकल्प सांकवाळे गांवांत नाकाच. कुठ्ठाळे मतदारसंघांत येवपी मेगा हावसिंग प्रकल्पाक आपलो विरोध आशिल्ल्याचें कुठ्ठाळीचे आमदार आंतोनियो वास हांणी सांगलें. गोंयां भायली रिअर इस्टेट लॉबी गोंयच्या पर्यावरणाचो विध्वंस करता. जमनींचें रुपांतर फटाफट जाता. ताका लागून गोंयकार, तांचीं भुरगीं हांचो फुडार कितें असो प्रस्न विरोधी पक्ष फुडारी युरी आलेमाव हांणी केलो.
सावळफोंड दोंगरार सुमार ३५ हजारी चौखण मिटर जाग्यार ६५० फ्लॅट आनी ७० व्हिला तशेंच दरेका फ्लॅटांनी स्विमिंग पूल, व्हड पांच स्विमिंग पूल असो मेगा हावसिंग प्रकल्प उबारपाचे आसात. ताका २००७ सावन विरोध जाता. तो आदीं मर्यादीत स्वरुपाचो आशिल्लो. मात तातूंत बदल जावन आनी मालकी हक्क दुसर्या कडेन वचून आतां तो मेगा प्रकल्प जाला. सांकवाळ पंचायतीन मार्च २०२४ त ताका परवानगी दिल्ली. ह्या वेळार पंच तुळशीदास नायक हांचे सयत चार पंचांनी विरोध केल्लो. पूण कांय पंचांनी तांचे कडेन आडनदर करून रातयां बांदकाम परवानगी दिली. ह्या प्रकल्पाक आतां गांवांतल्या विरोध जाता.
ह्या प्रकल्पाक विरोध करपाक बसके वेळार विरोधी पक्षनते युरी आलेमाव, केपेंचे आमदार एल्स्टन डिकॉस्ता, कुठ्ठाळेचे आमदार आंतोनियो वास, आदली मंत्री एलिना साल्ढाणा, पंच तुळशीदास नायक, सामाजीक वावुरपी प्रजल सांखळदांडे, रामा काणकोणकार, शंकर पोळजी, तारा केरकार, ओलंसियो सिमोयस, पीटर डिसोजा, नारायण नायक आनी हेर हाजीर आशिल्ले.
ह्या मेगा प्रकल्पा आड लढो दिवपा खातीर एकठांय येयात. कांय जाण तुमचे मदीं फूट घालपाचो यत्न करतले तेन्ना सादूर रावात असो उलो ह्या वेळार सगल्यांनी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
