भांगरभूंय | प्रतिनिधी
राजकारण आनी स्वाहाकापाक लागून सहकाराचें लुकसाण : मुख्यमंत्री
पणजी : सहकारांतल्यान समाजाची समृद्धी जावप शक्य आसा. सहकार संस्थांच्या उदरगती खातीर सहकार कायद्यांत आनीक दुरूस्ती जातली, अशें मुख्यमंत्री डॉ. प्रमोद सावंत हांणी सांगलें. पणजेत सहकार सप्तकाच्या समारोप कार्यावळींत ते उलयताले.
ह्या वेळार मुख्यमंत्र्यां हस्तुकी सहकार संघाच्या पुरस्कारांचें वांटप जालें. समाजाची समृद्धी वा उदरगत ही सहकारांतल्यान जावप शक्य आसा. गोवा अर्बन बँकेक 100 वर्सां पुराय जाल्यात. हाचो अर्थ सहकारा शिवाय समृद्धी ना, ही गजाल पूर्वजांक 100 वर्सां पयलीं कळिल्ली. गोंय राज्य सहकारांतल्यान स्वयंपूर्ण जावप शक्य आसा. स्वयंपूर्ण गोंय मोहीम ही सहकार तत्चाचेर आधारीत आसा. राजकारण आनी स्वाहाकार हातुंतल्यान सहकारी संस्थांचें बरेंच लुकसाण जालां. सहकारी संस्थांक वाटावपा खातीर राजकारण आनी स्वाहाकार हाका आळाबंद घालपाची गरज आसा. व्हिजनरी सारख्या संस्थांची स्वाहाकाराक लागून वाट लागल्या, अशें मुख्यमंत्र्यांनी सांगलें.
सहकारांतल्यान गोंय दुद, भाजी, नुस्तें हातुंत स्वयंपूर्ण जावं शकता. नुस्तें आनीक सवाय मेळप सहज शक्य आसा. सध्या दुदाक लागून 3 कोटी रूपया गोंयां भायर वतात. कोयराचेर सरकार कोट्यांनी रूपया मोडटा. सहकार चळवळींतल्यान स्वयंपूर्ण जावपा सयत समस्या सुटाव्यो जावप शक्य आसा. प्रधानमंत्री नरेंद्र मोदी हांणी कुशळटाय प्रशिक्षण दिवन तरणाट्यांक रोजगार मेळोवन दिवपा खातीर कुशळटाय मंत्रालय सुरू केलां, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
