भांगरभूंय | प्रतिनिधी
घोव नितीन सिन्हाक अटक
नवी दिल्ली, खबरां संस्था : सर्वोच्च न्यायालयाची वकील रेणु सिन्हा (61) हिचो खून जाला. ह्या प्रकरणांत 24 वरां स्वताच्याच बंगल्यांत लिपून आशिल्ल्या तिच्या घोवाक नितीन सिन्हाक पुलिसांनी अटक केल्या. आयतारा सांजवेळार रेणुची कूड बंगल्याच्या बाथरुमांत सांपडली. हो खून आशिल्ल्याचो पुलिसांनी अदमास उक्तायला.
रेणुच्या भावान कागाळ केल्ल्यान पुलीस थळार पावले. दार फोडून ते भितर सरले. रेणुच्या कुटुबान तिच्या घोवान हो खून केल्ल्याचो दुबाव उक्तायला. कूड मेळ्ळी तेन्ना तिचो घोव बेपत्ता जाल्लो. पुलीस ताका सोदताले. पूण मध्यानरातीं 3 वरांच्या सुमाराक पुलिसांनी ताका ताच्या घरांतूच धरलो. तो बंगल्याच्या स्टोर रूमांत लिपून राविल्लो. मालमत्तेच्या वादाक लागून हो खून जाल्ल्याचें स्पश्ट जालां.
बंगलो विकून विदेशांत वचपाचें आशिल्लें
नितीन हाका बंगलो विकून परदेशांत वचपाची इत्सा आशिल्ली. रेणुक मारचे पयलीं ताणें ब्रिटीश पासपोर्टूय तयार केल्लो. पूण रेणुक हो बंगलो विकपाची इत्सा नाशिल्ली. म्हणून नितीनान तिका मारून उडयली, असो पुलिसांक दुबाव आसा. रेणुक मारून उडयले उपरांत तिच्या घोवान कुडीचो विलो लावपाची तयारी केल्ली. बंगल्यांत पुलीस पावचे पयलीं नितीनान जायते पुरावे नश्ट केल्ले. पूण सगळे पुरावे मिटवचे पयलीं पुलीस थंय पावले. अटक केल्या उपरांत ताणें पुलिसांक सगळें खरें सांगलें.
रक्तांत माखिल्ली रेणुची कूड
सर्वोच्च न्यायालयांत प्रॅक्टीस करपी रेणु सिन्हा पाटणाची. ती घोवा वांगडा सेक्टर 30, नोयडा रावताली. तिचो पूत अमेरिकेंत आसा. तिका कॅन्सराचीय पिडा आशिल्ली. दोन दीस रेणुचो भाव तिका फोन करतालो, पूण रेणु फोन उखलनाशिल्ली. देखून ताणें पुलिशेंत कागाळ केली. तेन्ना पुलीस थळार आयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
