भांगरभूंय | प्रतिनिधी
भांगरभूंय । प्रतिनिधी
म्हापशेंः कोलवाळे इंटरनेट नेटवर्काचें सर्वेक्षण करतना रामा गुप्ता ह्या सर्वेक्षकांचें बळग्यां अपहरण करून ताची लुबाडणूक करपाचो प्रकाऱ घडलो. कोलवाळ पुलिसांनी दुबावीत मिलिंद रामकृष्ण नायक (49, हसापूर- पेडणे) आनी प्रकाश नकूल शेटकार (39, कोलवाळ) हांका अटक केल्या. शेटकार हो सरकारी कर्मचारी आसा. सोऱ्याचे घुंवळेंत तांणी ही काम केलें अशें पुलिसांनी सांगलां.
फाटल्या आयतारा दनपारां ही घडणूक जाली.
रामा गुप्ता हो विक्रोळी- मुंबयचो खाजगी सर्वेक्षक आसा. नॅशनल पेमेंट कॉर्पोरेशन ऑफ इंडिया खातीर तो कोलवाळे म्हामार्गा लागीं इंटरनेट नेटवर्काचें सर्वेक्षण करतालो. गोटणीव्हाळ- कोलवाळ हांका मेलिटा रेस्टॉरन्टा लागी दुबावितांनी ताका आपले स्कुटरीचेर बसपाक सांगलें. उपरांत सेंट्रल बंदखणी कडले सुवातेर व्हेंले, दुसरो दुबावीत थंय स्वीफ्ट गाडी घेवंन आयलो आनी मारपेट करून गाडयेंत बसोवन गुगल पे वरलीं 3500 रुपये तांच्या खात्यांत जमा करपाक सांगले, 80 हजार रुपयांचे दोन लिनोवा टॅब झोमून व्हेलें. करासवाडा हांका तांणी गुप्ताक हाडून सोडलें
गुप्तान सोमाराक सकाळी कोलवाळ पुलिसांत कागाळ केल्या उपरांत तांणी दोगूय दुबाविताक अटक करून मुद्देमाल जप्त केलो. पुलीस उपअधिक्षक जिवबा दळवी हांच्या मार्गदर्शना खाला कोलवाळ पुलिसांनी ही कारवाय केली. म्हापशें न्यायालयान दोगूय दुबावितांक दोन दिसांची पुलीस कायद दिल्या. प्रकाश शेटकार हो पेडें हांगचे आयटीआयत प्यून म्हणून काम करता. सरकारी कर्मचारी आशिल्ल्यान शिस्तभंगाचे कारवाये खातीर अहवाल सादर करतले अशें जिवबा दळवी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
