भांगरभूंय | प्रतिनिधी
शिक्षणीक निबंदांचें ‘सरस्वतीच्या आंगणांत’ हें एक मोलादीक पुस्तक. बरोवपी सौ. विजया नवीन शेळडेकार. विजयाबाय हांणी साबार वर्सां शिकोवपाचें काम केलां. ते खातीर तांकां विद्यार्थी, पालक आनी वांगडच्या सह-शिक्षकांचो सांगात लाबलो. हें काम करतना तांकां विंगड- विंगड शिबिरां, परिशदो, चर्चासत्रांनीं वांटेकार जावपाची संद लाबली. तेन्ना तांकां जे अणभव आयले ते ह्या पुस्तकांत विशद केल्यात.
आयचे शिक्षण वेवस्थेचेर भाश्य करपी 62 लेख तातूंत आस्पावीत आसात. तांची ‘विद्यार्थी प्रबोधन’, ‘पालक प्रबोधन’ आनी ‘शिक्षक प्रबोधन’ अश्या तीन वांट्यांनीं विभागणी करूं येता. लेखिकेन हांगां एका भुरग्यांच्या सर्वांगी उदरगती खातीर येवपी आडमेळीं आनी ताचेर आपल्या साबार वर्सांच्या अणभवाच्या बळार ताचेर उपाय सांगपाचो येत्न केला. ताचे फाटल्यान तांचे अणभव आसात. चिंतन आसा.
भुरग्यांच्या सर्वांगी विकासा खातीर कितें कितें करप गरजेचें आसा तें ह्या लेखांनीं विस्कटावन सांगलां. भुरग्यांच्यो अडचणी, मायेची ओलसाण, सुटयेंत मजा, खाण जेवण, वेळार तुस्त करुंया, वाचनाची आवड आदी भुरग्यां संबदी लेख, पालक कशे?, घराब्यांतले पालक, सांवरपी पालक, पालकांची परवड आदी पालकां संबंदी लेख, पालक-शिक्षकांची समजीकाय शिक्षकाचें नातें, गचाळ शिक्षक, शिक्षक आनी समाज अशे शिक्षकांसंबदी लेख मुजरत विचार करपा सारके. म्हाका दिसता भुरग्याच्या सर्वांगी विकासा खातीर गरज आशिल्ल्या सगल्या आंगांचेर भाश्य करपी हें कोंकणींतलें पयलेंच पुस्तक आसा. खास करून तातूंत सगळे तपशिलान आसात.
हें पुस्तक आयची शिक्षण पद्दत, वेवस्था आनी तिचो फ़ुडार हाचोय वेध घेता. हें पुस्तक सादे सोंपे शैलींत बरयिल्लें आसा आनी वाचप्याक शिक्षणा सारक्या क्लिश्ट विशयाचेर लेख वाचतना कांयच आडखळ जायना हें ह्या पुस्तकाच्या येसाचें एक आंग. शिक्षण हो विशय कितले सोंपे तरेन समजावं येता हाची कळाशी लेखिकेक शिक्षिकेचो अणभव जाल्ल्यान बेस बरी सादल्या. आपणें ज्या मळार काम केलां तांतले अणभव बरोवन काडून ते पुस्तक रुपांत हाडप आनी आपल्याक आयिल्लो अणभव समाजा कडेन शेअर करप हें खूप गरजेचें आसा.
ह्या पुस्तकाक डॉ. हनुमंत चोपडेकार हांणी विस्तृत अशीं प्रस्तावना बरयल्यांत. आपले प्रस्तावनेंत ते म्हण्टात,’ विद्यार्थी घडोवपाक सर्वस्वी पालक आनी शिक्षक जापसालदार आसतात. ल्हान भुरगो हो मातये समान. ताका तुमी जसो आकार दितात त्या प्रमाण तो घडत वता. भुरग्याचो पयलो गुरु ताची आवय हें आमी खूपदां आयकतात पूण गुरु ह्या शब्दाचो खूब संकुचीत अर्थ आमी लावन घेतात. आमचे नदरेन गुरू म्हणजे जो इश्कोलांत शिकयता तो. पूण वास्तवीक घरांत जेन्ना ल्हानाचें व्हड जाता तेन्ना तें नकळत आपल्या आवय बापायचें अनुकण करत आसता. हांगा एक गजाल लक्षांत घेवपा सारकी; व्हड मनशां भुरग्यां मुखार जे आदर्श दवरतात ताचेंच अनुकरण तीं कशीं करतात हाच्यो जायत्यो देखी वयर उल्लेख केल्ल्या लेखांनीं आसात. आमी जें पेरतात तेंच पिकता ह्या न्यायान भुरगीं आपल्या सरभोंवतणचें वातावरण कशें आसा त्या प्रमाणच घडटा असो निश्कर्श हे लेखांतल्यान लेखिका व्यक्त करता.’ वयर म्हळां तशें ह्या पुस्तकाचे विद्यार्थी, पालक आनी शिक्षक अशे तीन वांटे केल्ले जाल्यार बरें जावपाचें. लेखांचे वांटे घाल्ले जाल्यार वाचकांक नदरेन लावकारक थारपाचें आनी ताका अदीक सुसुत्राय येवपाची.
पुस्तकाचें मुखपृश्ठ सिया अतुल पंडीत हांचें आसा आनी पुस्तकाचे शिर्षकाक अनुसरुन सरस्वतीचें एक सुंदर चित्र सियान रेखाटलां. ह्या पुस्तकाचें आनीक एक खाशेलेंपण म्हणल्यार निबंद दालन फुलोवपी ह्या पुस्तकाक गोवा कोंकणी अकादेमीचो 2022 वर्साच्या निबंद साहित्य प्रकारांतलो पुरस्कार फावो जाला. हें पुस्तक कौशल प्रकाशन मडगांव हांणी उजवाडाक हाडलां.
सरस्वतीच्या आंगणांत
सौ. विजया नवीन शेळडेकार
प्रकाशक- कौशल प्रकाशन मडगांव
पानां- 206
मोल- 200 रुपया
सखाराम शेणवी बोरकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.