भांगरभूंय | प्रतिनिधी
अधिसुचोवणी जारी, 62 पंचायती बायलां खातीर राखीव
भांगरभूंय I प्रतिनिधी
पणजी : शुक्रारा निकाल जाहीर जाल्ल्या राज्यांतल्या 186 पंचायतींच्या सरपंच आनी उपसरपंचपदांच्या निवडी खातीर 22 ऑगस्टाक वेंचणुको जातल्यो. पंचायत संचालक सिद्धी हळर्णकार हांणी हे विशींची अधिसुचोवणी जारी केल्या.
मजगतीं, 186 पंचायतींतल्यान 62 पंचायतींच्या सरपंचपदार बायलांची नेमणूक जातली. 10 ऑगस्टाक मतदान जाल्ल्या 186 पंचायतींचो निकाल शुक्रारा जाहीर जाला. ह्या वेंचणुकांनी 1,528 पंच वेंचून आयले. 64 जाण पयलीच विरोधाविणें वेंचून आयिल्ले. ताका लागून ही वेंचणूक 1,464 प्रभागां खातीर जाल्ली. वेंचणुकेंत वट्ट 5,038 उमेदवार रिंगणांत आशिल्ले. तातूंतल्या जायत्या जाणांक येस मेळ्ळां. कांय पंचायतींतल्या नागरिकांनी परंपरीक उमेदवारांक कुशीक दवरून नव्या दमाच्या तरणाट्यांक संद दिल्या. तशेंच जायत्या पंचायतींनी प्रस्थापीत उमेदवारांक हार घेवची पडल्या. जाल्यार कांय पंचायतींनी अनपेक्षीत निकाल लागला.
आतां नागरिकांच्यो नदरो सरपंच आनी उपसरपंचपदाचो मान कोणाक मेळटलो, हाचे कडेन लागल्यात. 62 पंचायती बायलां खातीर राखीव दवरल्यात. जाल्यार 64 पंचायतींनी उपसरपंचपदाचो मान बायलांक मेळटलो.
बायलां सरपंचपद आशिल्ल्यो पंचायती
पेडणें : पालयें, केरी-तेरेखोल, तोरशें, तुयें, वारखंड-नागझर, विर्नोडें
बार्देस : पिळर्ण-मार्रा, रेयशमागूश, रेवोडें, साल्वादोर द मूंद, सांगोल्डें, शिवाली-सडयें, शिरसय, सुकूर, पोंबुर्फा, उसकय-पालयें-पुनोळा, वेर्ला-काणका
दिवचलः मुळगांव, पिळगांव, साळ, शिरगांव, सुर्ला, वेळगें
सत्तरी : नगरगांव, पर्यें, केरी, सांवड्डें
तिसवाडी : सांव मातियास, पोरणें गोंय, शिरदोन-पाळे, सांताक्रुज, सांत इस्तेव्ह, आगशी
फोंडें : पंचवाडी, कवळें, शिरोडें, वेलींग-प्रियोळ-कुंकळ्यें, वेरें-वाघुर्में, वाडी तळावली
साश्ट : कोलवा, पारोडा, रुमडामळ-दवर्ली, सां जुझे दी आरियाल, सारझोरा, सेरावली, तळावली, वार्का, वेळ्ळी
मुरगांव : माजोड्डें-उतोड्डें, सांकवाळ, वेळसांव, वेर्णा
धारबांदोडें : साकोड्डें
सांगें : रिवण, सांवड्डें, उगें
केपें : मोरपिर्ला, नाकेरी-बेतूल, शेल्डें
काणकोण : लोलयें-पोळे, पैंगीण, श्रीस्थळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
