भांगरभूंय | प्रतिनिधी
गोंय विधानसभेचें शिंयाळी अधिवेशन १६ ते १९ जानेवारी मेरेन जातलें. मात तें सुरु जावंचे आदींच नव्या वादांक तोंड फुटलां. भाजप सरकार सत्तेर येत सावन विरोधकांची सदाच एक कागाळ आसता ती म्हळ्यार सरकार विधानसभेचें अधिवेशन सामकें उणे दीस दवरता. ताका लागून प्रस्न विचारपाक आनी हेर मुद्दे मांडपाक विरोधकांक संद मेळना. शिंयाळी अधिवेशन आनीक एका मुद्द्याक लागून वादांत आडकलां. तो म्हळ्यार सभापती रमेश तवडकार हांणी घेतिल्लो निर्णय. तांणी आदेश काडला की आमदारांनी फकत ५ वर्सां मेरेनचेच प्रस्न विचारचे, ‘पास्ट हिस्ट्री’ विचारीत रावची न्हय. ह्या आदेशाक लागून विरोधक सरकाराचेर टिका करतना दिश्टी पडटात.
म्हजे कोतान सभापतींनी काडिल्लो हो आदेश आमचे लोकशायेक मारक आसा. विधानसभेंत लोकांनी वेंचून दिल्ले आमदार वतात. तांकां जाय ते प्रस्न विचारपाची आनी तांच्यो जापो घेवपाचो पुराय अधिकार आसपाक जाय. थंय खंयचेच बंधन आसपाक जायना. सभापतीनी हो असो आदेश कित्याक दिलो हाचें स्पष्टीकरण दिल्लें जाल्यार तें बऱ्याक पडपाचें. मात, तशें कांय स्पष्टीकरण तांचे कडल्यान अजून आयिल्लें ना. विधानसभा ही खरें म्हणल्यार लोकांचे प्रस्न मांडपाकूच आसता. तोच विधानसभेचो मुख्य गाभो आनी हेतू, मात ताचेरुच बंधनां हाडप हें कितपत योग्य काय?
हेर राज्यां परस आमची गोंय विधानसभा तशी खूप सोबर. हांगा कोण कोणाचेर कदेलां मारिनात वा कोण मायकूय फोडीनात. गोंय विधानसभेंत बऱ्या वक्त्यांचीय तशी कांय कमी ना. इतिहास पळयत जाल्यार डॉ. जॅक सिकेर, डॉ. काशिनाथ जल्मी, अॅड. रमाकांत खलप, मनोहर पर्रीकार, अॅड. दयानंद नार्वेकार, विष्णु वाघ, गोपाळराव मयेकार हांचे सारकिल्ल्या नामनेच्या वक्त्यांची वळेरी आमकां पळोवंक मेळटा. लोकप्रतिनिधीच्या विद्वत्तेचो आवाको, ताची उलोवपाची कळाशी, समाजाच्या प्रस्नांची आनी अडचणींची आशिल्ली जाण, समाजीक – संस्कृतीक आणि भाशीक जाण ह्यो अशो गजाली विधानसभेंत कळटात.
दुसरो मुद्दो म्हळ्यार अधिवेशनाचे उणे दीस. ते उणे केल्ल्यान ताचो खूप परिणाम जाता. सरकार अधिवेशनाचे दीस उणे कित्याक करता? विरोधकांक सरकाराआड उलोवपाची संद ना मेळची म्हूण हे करप चल्ला कांय असो प्रस्न विरोधकां सयत लोकांकूय सहाजीक पडटा. विधानसभा अधिवेशनाचे दोनूय फायदे आसात. जर सरकारान बरे काम केला जाल्यार तें बरें काम लोकां मेरेन पावोवपा खातीर सरकारान विधानसभा अधिवेशनाचे दीस वाडोवपाक जाय. अधिवेशनाच्या माध्यमातल्यांनूच विरोधकांक जापो दिवप आनी लोकां मेरेन केल्लें काम पावोवप हाचे सारकी बरी संद सरकारा कडेन आनीक दुसरी नासता.
आमचें गोंय हें जेमतेम १५ ते १६ लाख लोकसंख्येचें. हेर राज्यांच्या तुळेन एक जिल्हो कसो. मात हांगा सरले प्रस्न कांय कमी नात. कायदो सुवेवस्था आसत, कोयराचो प्रस्न आसत वा पर्यटनाच्यो समस्या…. हे सारकिल्ल्या प्रस्नांचेर विधानसभेत खोलायेन चर्चा जावन ताचेर उपाय येवचो ही प्रत्येक गोंयकाराची इत्सा आसा. मात, तशी खोलायेन चर्चा जाता काय? तर म्हजें स्पश्ट मत की ती जायना. दिसांतल्यान फकत दोन वरां तारांकीत आनी अतारांकीत प्रस्नां खातीर दितात. अधिवेशनाचे दीस उणे करपा वेल्यान विरोधकांची सरकाराचेर टीका जावप योग्यूच, मात दुसरे वटेन आमी हेंय पळोवपाक जाय की विरोधक ते ताकदीचे प्रस्न विचारपाक समर्थ आसात काय कितें? तांचो तितलो अभ्यास आनी बाकीचो हेर आवाको आसा काय कितें? तर तेय बाबतीत म्हाका तितलेशें बरें चित्र दिसना.
म्हज्या निरिक्षणा प्रमाण सद्या देशांत सत्ता गाजोवपी भाजप पक्ष विरोधाचीं सगलीं दारां बंद करपाक पेटल्या. मागेर तें विधानसभा अधिवेशनाचे दीस उणे करपाचें आसूं वा विरोधी आमदारांचें होलसेल इनकमींग आसूं. हर एक मार्गान भाजप विरोधकांक सोंपोवपाक सोदता. तांतूत जर विधानसभा अधिवेशनाचे दीस उणे करपाचे वा आमदारांक फकत ५ वर्सा मेरेनचेच प्रस्न विचारपाचीं बंधनां घालपाचे प्रकार अशेच चालू उरले जाल्यार फकत विधानसभा हो लोकशायेंतलो म्हत्वाचो घटकूच न्ही जाल्यार लोकशायूय धोक्यात येतली हातूंत दुबाव ना. वेल्यान श्रीलंके भशेन भारतांतूय अराजकताय माजपाची भिरांत न्हयकारपाक येना!
आमच्या भारतांत 2005 सावन म्हायती अधिकार कायदो अस्तित्वांत आसा. लोकशाय इतिहासांत हो कायदो एक क्रांती थारला. ताचे खाला भारताचो खंयचोय सामान्य नागरीक ताका जाय ती म्हायती मागपाक शकता आनी थारायल्ल्या वेळा भितर ताका ती मेळपाचें बंधन आसा. अशें आसतना विधानसभेंतल्या आमदारांचेर म्हायती मागपाचें बंधन हाडून सरकार सामान्य लोकां मेरेन कितें संदेश पावोपपाक सोदता? म्हायती अधिकार कायद्याच्या मुळाचेरुच हो घाव घातिल्ले भशेन जाता. ह्या कायद्या खाला आमदारांचेर सभापती अशें तरेचें चेपण घालपाकूच शकना.
टाळी एका हातान वाजना. जर सरकार वा सत्ताधीश खंयचेय चुकीचे पायंडे घालता आसत जाल्यार ताचो प्रतिकार करपा खातीर विरोधक हे तितलेच प्रबळ आसप गरजेचें. मात राज्य पातळेचेर आसूं वा देश पातळीचेर, दुबळ्या आनी विखुरलेल्या विरोधकांचो फायदो भाजप घेतना दिश्टी पडटा. आमच्या सभापतीन हो आदेश काडले उपरांत कांय मोजके आमदार सोडले जाल्यार हेर कोणूच ताचेर उलोवंक पसून ना. घडये विरोधी आमदारांक हो आदेश कितलो घातक हाचेंच गिन्याय ना कांय, असो प्रस्न पडटा. खरें म्हळ्यार सभापतीचो हो आदेश आयले उपरांत सगल्या विरोधी आमदारांनी एकठांय येत सरकार आनी सभापतीचेर चेपण हाडून हो आदेश रद्द करपाक लावप गरजेचें आशिल्ले. मात दुर्देवान तशें जाल्लें दिसना.
सभापती हो विधानसभेचो मुखेली आसता. ताचे खाला सगले आमदार, मुख्यमंत्री येतात. सभापती पद हे राज्यघटनेचें म्हत्वाचें पद. एकदां काय कोणूय मनीस ते कदेलार बसलो कांय ताणें निपक्षपातीपणान आपलें कर्तव्य करपाचें आसता. गोंयात जायते अशे बरे सभापती जावन गेले, जांणी विधानसभेंत बरे पायंडे घाले. सद्याचे सभापती रमेश तवडकार हेय एक उच्चशिक्षित आनी बरें व्यक्तिमत्व म्हूण फामाद आसा. तांणी हो आदेश बेगोबेग फाटीं घेत आमदारांक तांकां जाय ते आनी जाय तितल्या वर्सां फाटीचे, लोकांच्या आनी पर्यायान राज्याच्या हिताचे प्रस्न विचारपाची मुभा दिवची हीच गोंयकारांची मागणी आसा.
विश्वनाथ नेने
9604039519
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
