सरकारी मुळाव्या शाळांच्या स्थितीचो सर्व्हे सुरू

भांगरभूंय | प्रतिनिधी

विद्यार्थी संख्या उणी आशिल्ल्या शाळां विशीं मुख्यमंत्री घेतले निर्णय

भांगरभूंय I प्रतिनिधी
पणजी : अंदूंचें शिक्षणीक वर्स सुरू जालें पसून गोंयांतल्या कांय सरकारी मुळाव्या शाळांनी एकाय विद्यार्थ्याची हजेरी ना. जायत्या शाळांनी 10 परस उणे विद्यार्थी आसात. अशा शाळांचो शिक्षणीक खात्यान सर्व्हे सुरू केला. विद्यार्थ्यांची संख्या उणी आशिल्ल्या शाळांचो मुख्यमंत्री तशेंच शिक्षणमंत्री डॉ. प्रमोद सावंत निर्णय घेतले.
विद्यार्थ्यांच्या उणावाक लागून राज्यांतल्याे सरकारी मुळाव्यो शाळा बंद पडपाचें सत्र फाटल्या कांय वर्सां पसून सुरू आसा. ह्याच कारणांक लागून फाटल्या वर्सा राज्यभरांतल्याे आठ सरकारी मुळाव्यो शाळा बंद पडिल्ल्यो. अंदूंचे शिक्षणीक वर्स सुरू जावन दोन म्हयने जाले तरी कांय शाळांनी अजून एकूय विद्यार्थी दाखल जावंक ना. कांय शाळांनी विद्यार्थ्यांची संख्या 10 परस उणी आसा. अशा शाळांचो सर्व्हे शिक्षण खात्यान फाटल्या म्हयन्या पसुनूच सुरू केला. फुडले कांय दीस हो सर्व्हे सुरू उरतलो. ते उपरांत अशा शाळांचे कितें करपाचे, हे विशीं मुख्यमंत्री निर्णय घेतले, अशी म्हायती शिक्षण खात्याच्या एका ज्येश्ठ अधिकाऱ्यान दिली.
हाचे मुखार ज्या सरकारी मुळाव्या शाळांनी विद्यार्थ्यांची संख्या उणी आसा, अशा शाळांचे लागसारच्या सरकारी शाळांनी विलिनीकरण करपाचो सरकाराचो विचार आसा, अशें मुख्यमंत्री डॉ. सावंत हांणी विधानसभेच्या पावसाळी अधिवेशनांत स्पश्ट केल्ले. तशेंच कांय शाळांचे विलिनीकरण जातले, आनी जंय विद्यार्थीच नात, त्यो शाळा बंद करपाची शक्यताय आसा.

सरकारी मुळाव्यो शाळां कित्याक बंद पडटात?
-गोंयांतल्या जायत्या सरकारी मुळाव्या शाळांनी विद्यार्थी चड आनी एकूच शिक्षक आसा. ज्या शाळांनी दोन शिक्षक आसात, तातूंतलो एक शिक्षक वर्सांतले स म्हयने वेंचणुको आनी हेर सरकारी कामांत बिझी आसता.
-सरकारी मुळाव्या शाळांनी भुरग्यांक गरजेचें शिक्षण दिनात असो ग्रामीण वाठारांतल्या पालकांचो दावो आसा. ताका लागुनूच जायते पालक आपल्या भुरग्यांक लागसारच्या खाजगी शाळांनी धाडपाचो निर्णय घेतात.
-कांय वाठारांतल्या शाळांच्या इमारतीची बाबत स्थिती आसा. कांय शाळा खाजगी घरांनी चलतात. थंय विद्यार्थ्यां खातीर गरजेच्यो साधन-सुविधा उपलब्ध नासतात. उरफाटे खाजगी शाळांनी डोनेशन भरचें पडलें तरी थंय सगल्यो सुविधा मेळटात. ताका लागुनूच खाजगी शाळांक म्हत्व आयलां.

अर्थीक नदरेन दुर्बळ घटकांक फटको
सरकारी मुळाव्या शाळांनी फुकट शिक्षण मेळटा. उरफाटे खाजगी शाळांनी डोनेशन, म्हयन्याची फी भरची पडटा. विद्यार्थ्यांनी खाजगी शाळांनी प्रवेश घेतिल्ल्यान सरकारी शाळा बंद पडटात. ते खातीर अर्थीक नदरेन दुर्बळ घटकांक आपल्या भुरग्यांक खाजगी शाळांनी धाडचे पडटा. ताचो व्हड फटको तांकां सोसचो पडटा. सरकारान मुळाव्या शाळांनी योग्य साधन-सुविधा उपलब्ध करून तांचो दर्जो वाडयल्यार तशेंच योग्य शिक्षण पद्दत आपणायल्यार विद्यार्थी परतून सरकारी शाळांनी आकर्शीत जातले. अशें पालकांचें मत आसा.