सरकारी नोकरी जाय, राजकी वशिलो चलचो ना

भांगरभूंय | प्रतिनिधी

-कर्मचारी भरती आयोगा वरवीं नोकऱ्यां खातीर जायराती सुरू

पणजी: मुख्यमंत्री डॉ. प्रमोद सावंत हांणी दिल्ल्या आस्वासना प्रमाण, कर्मचारी भरती आयोगा वरवीं (स्टाफ सिलेक्शन कमिशन) नोकर भरती सुरू जाल्या. आयोगान शुक्रारा सरकारी खात्यांतल्या 33 पदां खातीर जायरात प्रसिद्ध करून उमेदवारांक 22 जानेवारी 2024 मेरेन ऑनलायन पद्दतीन अर्ज करपाचें आवाहन केलां. अायोगाच्या ह्या जायरातीक लागून सरकारी नोकरे खातीर राजकी वशिलो चलचो ना, हें अातां स्पश्ट जाला.

कर्मचारी भरती आयोगा वरवीं सरकारी नोकरे खातीर घेवपी परिक्षा कॉम्प्युटर बेस (सीबीटी) परिक्षा घेतले. जानेवारी पसून दरेक म्हयन्याक सरकारी खात्यांतलीं रितीं पदां आयोगा वरवीं भरतले. गोंयांत सरकारी नोकरेंत मोट्या प्रमाणांत भ्रश्टाचार सुरू आशिल्लो. सरकारी नोकरी मेळोवपाक नागरिकांची मंत्री, आमदारांच्या घरां कडेन गर्दी जाताली. ते खातीर तांकां लाखांनी रुपया मेजचे पडटाले. अशा प्रकारांक लागून पात्र उमेदवारांचेर अन्याय जातालो. ताका लागुनूच मुख्यमंत्री डॉ. प्रमोद सावंत हांणी हाचे मुखार सरकारी नोकऱ्यो कर्मचारी भरती आयोगा वरवी दिवपाचे जाहीर केल्ले. ते प्रमाण आयोगाची स्थापणूक केली. नेम अधिसुचीत जाले उपरांत आयोगेान बेगोबेग नोकरभरतीच्या कामाक सुरवात केल्या. ते प्रमाण सगल्याच सरकारी खात्यांतल्या रित्या पदांची वळेरी आयोगान मागयिल्ली. ह्या पदांची छाननी जाले उपरांत पयल्या टप्प्यांत 33 पदांची भरती करपाचे निश्चीत करून आयोगान शुक्रारा हे विशीची जायरात प्रसिद्ध केली.

हे भरती खातीर उमेदवारांक कॉम्प्युटर बेस पद्दतीन परिक्षा दिवची पडटली. हाचे मुखार दरेक म्हयन्यांत अायोगा कडल्यान रित्या पदां खातीर जायरात प्रसिद्ध करतले.

आयोगा वरवीं भरपाचीं पदां

-येरादारीः नेटवर्क अभियंता 3 : उक्तो गट 1, एसटी 1, ओबीसी 1

– पुलीस लॅब टॅक्नीशियन 1ः उक्तो गट)

– सहाय्यक उपनिरिक्षक (वायरलेस ऑपरेटर) 1 : उक्तो गट

– उच्च शिक्षण टेक्निशियन 3 : उक्तो गट

– लायब्ररीयन ग्रेड 1ः 8 : उक्तो गट 5, एसटी 1, ओबीसी 2

– लायब्ररीयन ग्रेड 2 (8 : उक्तो गट : 5, एसटी : 1, ओबीसी : 2

– शिक्षण माध्यमीक पांवड्यार चित्रकला शिक्षक 7 : उक्तो गट : 4, एसटी : 1, ओबीसी : 1, एडब्ल्यूएस 1

– वस्तूसंग्रहालय संभाशण सहाय्यक 1 : उक्तो गट

– बंदर आनी कप्तान लायट हावस किपर 1 : उक्तो गट

दिल्लें आस्वासन वेळांत पुरायः मुख्यमंत्री

सरकारी नोकरभरती स्टाफ सिलेक्शन कमिशना वरवीं करपाचें लोकांक दिल्लें आस्वासन राज्य सरकारान वेळांत पुराय केलां. हे प्रक्रियेक लागून सरकारी नोकरभरती पारदर्शक जातली, असो ठाम विस्वास मुख्यमंत्री डॉ. प्रमोद सावंत हांणी सोशल मिडिया वरवीं उक्तायलां.