भांगरभूंय | प्रतिनिधी
शिरवय – केपेंची घडणूक
तीन दुबावितां आड गुन्यांव
12 विक्रीपत्रां उपनिबंधका कडेन नोंद
भांगरभूंय । प्रतिनिधी
पणजी : शिरवय – केपेंची सर्व्हे नंबर 109/1, 109/2 आनी 109/3 तली जमीन सरकारी आसा हें खबर आसून लेगीत स्वताक कायदेशीर जमनीचो धनी म्हूण दाखोवन प्लॉटांची विक्री केल्या. ह्या प्रकरणांत केपें पुलिसांनी दुबावीत योगेश कुंकळ्येकार, प्रमोद कुंकळ्येकार आनी परेश कुंकळ्येकार हांचे आड गुन्यांव दाखल केला.
ह्या प्रकरणांत केपेंचे मामलेदार नेथन आफोंसे हांणी कागाळ दाखल केल्या. ते प्रमाण शिरवय – केपेंची सर्वे नं. 109/1 तली 4,475 चौखण मिटर, 109/2 तली 2,525 चौखण मिटर आनी 109/3 तली 7,000 चौखण मिटर सरकाराची जमीन हडप केल्या, अशें म्हणलां. ते प्रमाण दुबावीत योगेश कुंकळ्येकार, परेश कुंकळ्येकार आनी प्रमोद कुंकळ्येकार हांणी वयली जमीन जाणा जावन डॉ. काशीनाथ वसंत शिरवयकार आनी तांची घरकान्न संगिता शिरवयकार हांचे कडल्यान खरेदी केली. मजगतीं शिरवयकार जोडप्याक मरण आयलें. ते उपरांत दुबावितांनी 17 ऑक्टोबर 1996 ते 21 डिसेंबर 2009 मजगतीं स्वताक कायदेशीर जमनीचे धनी म्हूण सादर करून प्लॉट केले. ते उपरांत ती जमीन विकून सरकाराची फटवणूक केल्या, अशें कागाळेंत म्हणलां.
ह्या प्रकरणांत केपेंचे पुलीस निरिक्षक अर्जून सांगोडकार हांच्या मार्गदर्शना खाला महिला उपनिरिक्षक जॉयसी कार्व्हालो हांणी योगेश कुंकळ्येकार, प्रमोद कुंकळ्येकार आनी परेश कुंकळ्येकार हांचे आड भारतीय दंड संहितेच्या कलम 465, 468, 471, 420 आरडब्ल्यू 34 खाला गुन्यांव दाखल करून तपास सुरू केला.
शिरवय – केपेंची सर्व्हे नं. 109/1, 109/2 आनी 109/3 तले जमनीर बेकायदो बांदकाम जाता असो दावो करून विशांता शिरवयकार हांणी गोंयांतल्या मुंबय उच्च न्यायालयांत 17 जानेवारी 2025 ह्या दिसा याचिका दाखल केल्ली. तातूंत राज्य सरकार, नगरनियोजन खातें, केपें उपजिल्होधिकारी, केपें मामलेदार, केपें मुळावें भलायकी केंद्र आनी केपें नगरपालिकेक प्रतिवादी केल्ले.
ह्या प्रकरणांत न्यायालयांत सुनावणी जाली तेन्ना केपेंच्या मामलेदाराक कारवाय करचे खातीर संबंदीत बांदकामाची तपासणी करपाची सुचोवणी दिल्ल्याची म्हायती सरकारी वकिलान न्यायालयांत दिली. हाची दखल घेवन स म्हयन्यांत कारवाय करपाचे आदेश उच्च न्यायालयान 5 मार्च 2025 ह्या दिसा दिवन याचिका निकालांत काडली. ते प्रमाम केपेंच्या मामलेदारान वयले जमनीची पळोवणी केली तेन्ना संबंदीत जमीन सरकाराची आशिल्ल्याचें मुखार आयलें.
ते उपरांत ह्या प्रकरणांत केपेंच्या उपजिल्होधिकाऱ्यान बांदकाम करप्याची सुनावणी घेतली तेन्ना वयल्या दुबावितां कडल्यान जमीन विकत घेतिल्ल्याचें मुखार आयलें. तशेंच संबंदीत जमनीची विक्रीपत्र केपेंच्या उपनिबंधका कडेन नोंदणी केल्ल्याचें मुखार आयलें.
ह्या प्रकरणाची अदीक चवकशी केली तेन्ना वयले जमनींत 12 विक्रीपत्रां उपनिबंधका कडेन नोंद जाल्ल्याचें मुखार आयलें. हाची दखल घेवन केपेंचे मामलेदार नेथन आफोंसो हांणी मे म्हयन्यांत कागाळ दाखल केल्ली. ते उपरांत केपें पुलिसांनी मुळावी चवकशी करून 23 जून 2025 ह्या दिसा गुन्यांव दाखल केलो. मदल्या काळांत हे कागाळीचेर गुन्यांव दाखल करपाक पुलिसांनी घाळपणां केल्ल्याचेंय मुखार आयलें. ते उपरांत ह्या प्रकरणांत दक्षीण गोंय पुलीस अधिक्षकान कायदो तज्ञा कडल्यान सल्लो घेतले उपरांत पुलिसांनी गुन्यांव दाखल केल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
