भांगरभूंय | प्रतिनिधी
दिवचल, प्रतिनिधी: जनता दरबारांत दरेका सरकारी खात्यान आपलें रिपोर्ट कार्ड सादर करून ज्यो समस्या, उणाव आसात ते सोदून काडच्यो आनी त्यो सोडोवपाक सहकार्य करचें. आदर्श गांव, पालिका निर्माण करपा खातीर कल आसपाक जाय. नियोजीत कामां वेळार पुराय करपा खातीर लोकप्रतिनिधी आनी जनता, सरकारी अधिकारी हांणी समन्वय साधून जनतेचे प्रस्न सोडोवचे अशें उदकास्रोत मंत्री सुभाष शिरोडकार हांणी म्हणलें.
सतत लोकप्रतिनिधी, सरकारी अधिकारी हांचे मदीं जावपी जागृताय हातूंततल्यानूच उदरगत चालीक लागता. जनता दरबारा वरवीं दरेका गांवचे उदरगतीक गती दिवपाक मेळटा. लोकप्रतिनिधींनी जागृत रावन उदरगत चालीक लावपाक कार्यरत रावचें असो उलो मंत्री शिरोडकार हांणी दिलो.
मुलभूत सुविधा, पांयाभूत सुविधा, जनतेचे प्रस्न, समस्या हे विशीं जनतेक न्याय मेळचो. गोंयांत पंचवीस लोकां फाटल्यान एक सरकारी अधिकारी आशिल्ल्यान ताची साथ खूब म्हत्वाची, अशेंय तांणी फुडें म्हणलें.
सांखळे रवींद्र भवनांत आयोजीत जनता दरबारांत आमदार डॉ चंद्रकांत शेट्ये, आमदार प्रेमेंद्र शेट, उत्तर गोंय जिल्होधिकारी मामू हागे, निधिन वॉल्सन उत्तर गोंय अधीक्षक, नगराध्यक्ष रश्मी देसाय, कुंदन फळारी, जिल्हो पंचायत वांगडी महेश सावंत, प्रदीप रेवोडकार, गोपाळ सुर्लकार, उपजिल्होधिकारी रोहन कांसकार, मामलेदार राजाराम परब आनी हेर हाजीर आशिल्ले.
ह्या जनता दरबारांत प्रत्यक्षांत जनता वा लोकप्रतिनिधी परस सरकारी अधिकारीच चड नदरेक पडले. पंचायत वांगडी तशेंच जनता उण्या प्रमाणांत हाजीर रावली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
