भांगरभूंय | प्रतिनिधी
संजय बर्डेः अकार्यक्षम कर्मचाऱ्यांक सरकार घरा धाडटलें?
भांगरभूंय । प्रतिनिधी
म्हापशें: गोंय सरकारान कामांत घाळपणां आनी कामचुकारपणा करपी कर्मचाऱ्यां संबंदांत घेतिल्लो निर्णय योग्य आसा, पूण ताची अंमलबजावणी निश्पक्षणान जावपाक जाय. कारवाये खाला भाजपा आड हेर पक्ष समर्थक, असो भेदभाव करचो न्हय, अशी मागणी काँग्रेस पक्षाचे म्हणयारे संजय बर्डे हांणी केल्या.
म्हापशेंच्या पक्ष कार्यालयांत शुक्रारा घेतिल्ले पत्रकार परिशदेंत बर्डे उलयताले. ह्या वेळार सीताराम उर्फ बाबून कांदोळकार आनी सितेश मोरे हाजीर आशिल्ले.
दरेका सरकारी कार्यालयांत सीसीटीव्ही कॅमेरे लावचे. ताका लागून कोण कामचुकारपणा करता, तें स्पश्ट दिसतलें. तांचेर कसलोच भेदभाव करिनासतना कारवाय करची. खूबश्या सरकारी कर्मचाऱ्यांनी कोणाच्या तरी हाताचेर पयशे दवरीन नोकरी मेळयल्या. जांची कार्यक्षमता ना, अशा कर्मचाऱ्यांक सरकारी नोकरी दिल्या. तांकां सरकार घरा धाडटले व्हय, असो प्रस्न बर्डे हांणी उपस्थीत केलो. सरकार खूबश्यो संकल्पना मांडटा. पूण गृहरक्षक, येरादारी पुलीस, आंगणवाडी शिक्षिका हांचो पगार दिवपाक सरकार वेळ काडटा. हीं सरकाराचीं कामचुकारपणा न्हय, असोय प्रस्न बर्डे हांणी मांडलो.
भाजपा सरकारूच करता कामचुकारपणाः बर्डे
प्रत्यक्षांत भाजपा सरकारूच कामचुकारपणा करता. विधानसभा अधिवेशन फक्त आठ दिसां भितर गुठलावन लोकांच्या दोळ्यांत उदक लायलें. सरकारान विधानसभेचें कामकाज म्हयनोभर चलोवन स्वताची कार्यक्षमता सिद्ध करून दाखोवची. भाजपा सरकाराक दिसता आसतलें, काँग्रेसी कडेन फक्त तिनूच आमदार आसात. पूण पांच पांडवूच शंबर कौरवांक जड जाले, हें तांणी विसरचें न्हय. महाभारतांतल्यो घडणुको सरकारान उगडास करच्यो, अशी शिटकावणी संजय बर्डे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
