भांगरभूंय | प्रतिनिधी
पणजीः उच्च न्यायालयाच्या आदेशा प्रमाण, पंचायत खात्यान जारी केल्ल्या आदेशा प्रमाण राज्यांतल्या गांवठाण, सरकारी आनी कोमुनिदादीच्या जमनींत अतिक्रमण करून उबारिल्ल्या बांदकामाचें सर्वेक्षण सुरू केला. तलाठी सर्वेक्षण आंकड्याचेर आदारून अशीं बांदकामां थारायतना नागरिकां मदीं भंयाचे वातावरण पातळ्ळां. इतलेंच न्हय जाल्यार हाका लागून नगरपालिका आनी पंचायतीं मदीं पेंचात सांपडल्यात.
एका प्रकरणाचे सुनावणे वेळार उच्च न्यायालयान राज्यांतल्या गांवठाण, सरकारी आनी कोमुनिदादीच्या जमनींत अनधिकृत बांदकाम वाडत आसा अशें निरिक्षण नोंद करून 6 मार्च 2025 दिसा अतिक्रमणाचेर आळाबंदा हाडपा खातीर दरेका म्हालांत घोळटे पंगड नेमपाचो आनी कागाळीं खातीर व्हॉट्सअॅप क्रमांक जारी करपाचो निर्देश दिलो. हाचे वांगडाच न्यायालयान अशा बांदकामा संबंदी आठ श्रेणीय थारायल्ले. पयल्या वर्गांत पालिका वाठारांतल्या रस्त्या कुशीक, म्हामार्ग आनी मुखेल रस्त्यांचेर बांदकाम, दुसऱ्या श्रेणींत पंचायती वाठारांतल्या रस्त्या कुशीक, म्हामार्ग आनी मुखेल रस्त्यांचेर बांदकाम, तिसऱ्या श्रेणींत वेपारी हेतान वापरिल्ल्या पंचायत वाठारांतल्या बांदकामांचो आस्पाव जाता, चवथ्या श्रेणींत वेपारी हेतून वापरिल्ल्या नगरपालिका वाठारांतल्या बांदकामांचो आस्पाव जाता, पांचव्या श्रेणींत भात शेतांतल्या बांदकामांचो आस्पाव जाता. सरकारी मालमत्ता, सातव्या श्रेणींत कोमुनिदादीच्या जमनीचेर बांदकाम आनी आठव्या श्रेणींत भाड्याच्या जमनीचेर बांदकामांचो आस्पाव जाता. ह्या सगळ्या वर्गांतल्या अनधिकृत बांदकामांचो सर्वेक्षण करपाचो आदेश न्यायालयान दिल्लो. ते प्रमाण पंचायत खात्यान एक परिपत्रक जारी करून पंचायत सचीव आनी तलाठ्यांक अशा बांदकामांचें सर्वेक्षण करून न्यायालयाच्या आदेशाक खरपणान पाळो दिवपाचें निर्देश दिलें. देखून दर एका म्हालांत अशीं बांदकामां वळखुपा खातीर तलाठ्यांनी सर्वेक्षण सुरू केल्ल्यान नागरिकां मदीं हुस्को निर्माण जाला.
……………………………
अनधिकृत बांदकामांत गोंयकारांचीय घरां
– नागरिकांनी जायत्या वर्सां आदीं सगळ्या वाठारांनी गांवठाण, सरकारी, आनी कोमुनिदादीच्या जमनीचेर घरां बांदल्यांत. तशेंच म्हामार्गाक लागसारच्यो सरकारी जमनी कांय लोक वेपारा खातीर वापरपाक लागल्यात.
– तलाठ्यांनी अनधिकृत बांदकामांचे सर्वेक्षण सुरू केल्ल्यान अशीं बांदकामां मोडटलें असो भंय नागरिकांक आसा.
– अशा बांदकामांत गोंयकार नागरीकांच्या बांदकामांचोय आस्पाव आशिल्ल्यान पंचायती आनी नगरपालिकाय पेंचात सांपडल्यात.
……………………………
फाटल्या कांय म्हयन्यांत सरकारान न्यायालयाच्या आदेशा प्रमाण, कांय वाठारांनी अनधिकृत घरां बुलडोझर वापरून मोडल्यात. स्थलांतरीत आनी थळाव्या दोगांयकय ताचो भार सोंसचो पडलो. असो वेळ परतून आमचेर येतलो असो भंय अनधिकृत घरांनी रावपी नागरिकांक दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
