भांगरभूंय | प्रतिनिधी
सुभाष शिरोडकारः जमीन प्रस्नाक लागून चार धरणांची प्रक्रिया वतली फुडें
भांगरभूंय । प्रतिनिधी
पणजीः म्हादय न्हंयेचेर नियोजीत स मदलीं दोन लघू धरणां बांदपाचे प्रक्रियेक सरकारन गती दिल्या. सत्तरी आनी धारबांदोडें ह्या दोन म्हालांत हीं धरणां बांदतले, अशी म्हायती उदक शिंपणावळ मंत्री सुभाष शिरोडकार हांणी शुक्रारा पत्रकारां कडेन उलयतना दिली.
म्हादय न्हंयेचेर लघू धरणां बांदून न्हंयेचें उदक शेता खातीर वापरपाचो निर्णय कांय वर्सां आदीं राज्य सरकारान घेतिल्लो. ते प्रमाण, मंत्री शिरोडकार हांणी कांय म्हयन्यां आदीं धरणां बांदपा खातीर सुवातांचो सर्व्हे करून स कडेन लघू धरणां बांदपाचेंय निश्चीत केलां.
स लघू धरणांतली चार धरणां बांदतना सरकारा मुखार जमनीचो प्रस्न उबो रावला. ह्या वाठारांतली चडशी जमीन खासगी मालकेची आसा. जमीन धनया कडेन चर्चा करून आनी तांच्यो मागण्यो पुराय करून जमीन संपादीत करची पडटली. ते भायर कांय जमीन सरकाराच्या आनी हेर खात्यांच्या मालकीची आसा. ती जमीन लेगीत संबंदीत करतना कांय प्रक्रिया पुराय करच्यो पडटल्यो. ते उपरांतूच थंय लघू धरणांचो प्रकल्प सुरू करप शक्य जातलें, अशें शिरोडकार हांणी सांगलें.
सध्याचे स्थितींत सत्तरी आनी धारबांदोड्यां निश्चीत केल्ले सुवातेंत लघू धरणां बांदपाक कसलीच आडखळ नाशिल्ल्यान शिंपणावळ खात्यान प्राधान्यान ह्या दोन धरणांचें काम जाता तितले बेगीन पुराय करपाचें थारायलां. ते नदरेन गरजेची ती प्रक्रिया पुराय करतात. ताका लागून दोनूय धरणांचें काम रोखड्या रोखडें सुरू करून तातूंतलें एक धरण 2023 मेरेन पुराय करतले, अशी म्हायती शिरोडकार हांणी दिली. मजगतीं, कर्नाटका कडल्यान लेगीत म्हादयचेर लघू धरणां बांदपा संबंदांत प्रक्रिया सुरू केल्या. ते खातीर लागपी परवाने केंद्रीय पर्यावरण मंत्रालया कडल्यान मेळोवपाचे यत्न कर्नाटकान सुरू केल्यात. ताचो गोंयाचेर परिणाम जावपाक शकता व्हय, असो प्रस्न प्रतिनिधीन मंत्री शिरोडकार हांकां केलो. ताचेर जाप दितना तांणी सांगलें, हो प्रस्न सोडोवपा खातीर स्थापन केल्लो उदक तंटो लवाद हे संबंदांत योग्य निर्णय घेतलो.
अवमान याचिके वयली सुनावणी सप्टेंबरांत…
म्हादय संबंदांत गोंय सरकारान कर्नाटका आड अवमान याचिका दाखल केल्या. ताचे वयली सुनावणी सप्टेंबराचे अखेरेक वा ऑक्टोबराच्या पयल्या सप्तकांत सर्वोच्च न्यायालयांत सुनावणी खातीर येवपाक शकता, अशें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
