भांगरभूंय | प्रतिनिधी
गांवगिर्या विद्यार्थ्यां खातीर मुफत बस सेवेचें उक्तावण
दिवचल: शिक्षणीक मळार विद्यार्थ्यांक सगले तरेच्यो शिक्षणीक सुविधायो दिवपा वांगडा तांकां फुकट येरादारी वेवस्था दिवपाचेरूय सरकारान विशेश भर दिल्या. जिल्लो मिनरल निधीच्या खाला उत्तर, दक्षीण गोंयांत खाण पट्ट्यांत आनी गांवगिर्या वाठारांतल्या भुरग्यांक नेमान मुफत येरादारी वेवस्था करपाक सरकार कटीबद्ध आसा. दरेका मळार सरकार आपले तरेन योगदान दिता. हाका लागून बरे गजालीची कदर करात असो उलो मुख्यमंत्री डॉ. प्रमोद सावंत हांणी सांखळे मारलो.
जिल्लो मिनरल निधी खाला उत्तर गोंयांत दिवचल म्हालांतल्या स सुवातांचेर खाण आनी गांवगिर्या वाठारांतल्या विद्यार्थ्यां खातीर फुकट बस सेवा सुरू केली. ताचें उक्तावण मुख्यमंत्री सावंत हांचे हस्तुकीं केलें. ही सेवा स्कूल विद्यार्थी आनी महा विद्यालयांतल्या विद्यार्थ्यां खातीर आसतली.
ह्या वेळार आमदार डॉ. चंद्रकांत शेट्ये, रोहन कांसकर नगराध्यक्ष सिद्धी प्रभू, गोपाळ सुर्लकार, शैलेश झिंगडे, मनोज सावयकार आनी हेर मानेस्त हजर आशिल्ले.
सरकाराच्या खुबश्या बर्या उपक्रमांक जनतेचो वांगड म्हत्वाचो. ‘म्हजी बस’ येवजण ही विद्यार्थ्यांक प्रवास सुखदेणो जावचे खातीर सुरू केल्ल्यान हाचो कोणेंच गैरवापर करचो न्हय हाची जतनाय सगल्यांनी घेवची असो उलो मुख्यमंत्र्यान मारलो. सरकार जायत्या मळांचेर विवीध येवजण्यो राबयता. ह्या येवजण्यांची म्हायती दिवप तितलेंच गरजेचें. हाका लागून शिक्षकांनी सरकारच्यो येवजण्यो पालक विद्यार्थ्यां मेरेन पावोवच्यो. शिक्षक मात अशें करतना दिसनात अशेंय तांणी सांगलें.
जायत्यो येवजण्यो आसात. बर्यो गजाली जरी मुखार येनात तरी तांची दखल घेवची होच आमचो हेतू आशिल्ल्याचेंय तांणी सांगलें.
जनतेच्या रक्षणा खातीर राज्यांतल्या सगल्या घटकांक सगले तरेच्यो सुख सुविधायो मेळच्यो. हे खातीर सरकार सेगीत यत्न करता. आदीं खाण विभागांतल्यान खनिज कंपन्यां वरवीं बस सेवा आसताली. मात ताचे उपरांतची गैरसोय लक्षांत घेवन सरकारान जिल्लो मिनरल निधींतल्यान उत्तर आनी दक्षीण गोंयांत विद्यार्थ्यांचे सोयी खातीर बस सेवा सुरू करपाचो निर्णय घेतिल्ल्याचें मुख्यमंत्र्यान सांगलें.
ह्या वेळार बावटो दाखोवन हे बस सेवेचें मुख्यमंत्र्यांचे हस्तुकीं उक्तावण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
