भांगरभूंय | प्रतिनिधी
वास्को: गांधीनगरांत उदका पायपलायन फुटून उदक रस्त्यार व्हांवतालें. पूण भौशीक बांदकाम खात्याच्या अभियंत्यांक दखल घेवपाक वेळ नाशिल्लो. पूण समाजीक कार्यकर्ते शंकर पोळजी हांणी काल (बुधवारा) समाज माध्यमांतल्यान आवाज उठोवन भौशीक बांदकाम खात्याच्या मंत्र्याक संबंदीत अभियंत्या आड कारवाय करपाची मागणी केली, आनी रोखडेच अभियंते दुरुस्तीच्या कामाक लागून फुटिल्ली उदकाची पायपलायन सारकी केली.
गांधीनगरांत उदका पायपलायन फुटून खूब दीस जाल्ले. पूण ही पायपलायन दुरुस्त करचे बदला संबंदीत अभियंते ओग्गी बशिल्ले. ह्या प्रकरणाची दखल घेतना शंकर पोळजी हांणी थंयचो एक व्हिडियो तयार करून समाज माध्यमाचेर व्हायरल केलो.
ह्या व्हिडियोंत तांणी गोंय सरकारान कामचुकार अधिकारी, कामगार हांचे आड कारवाय करून तांकां सेवेंतल्यान सक्तीची निवृत्ती दिवन घरा धाडटले ह्या परिपत्रकाची याद करून दिली.
त्या परिपत्रका प्रमाण कारवाय करपाची मागणी संबंदीत मंत्र्या कडेन केली. हो व्हिडियो व्हायरल जातकूच अभियंते जागे जाले. तांणी फुटिल्ल्या उदका पायपलायनीचें काम हातांत घेवन ती रोखडीच दुरुस्त केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
