भांगरभूंय | प्रतिनिधी
-कर्मचाऱ्यां सयत इमारतींत येवपी नागरिकांक धोको
पणजी : समाज कल्याण खात्याच्या इमारतीची सध्या बाबत अवस्था जाल्या. पांख्यांक गळटी, वेरो पडिल्लो वणटी, जायतीं वर्सां जाली इमारतीची देखभाल करूंक नाशिल्ल्यान हे इमारतींत कामकाज करपी कर्मचाऱ्यांच्या जिविताक धोको उप्रासला. समाजांतल्या विवीध घटकांच्या कल्याणाचे काम करपी खात्याची इमारत सध्या धोक्याचे स्थितींत आसा. हाका लागून फक्त कर्मचाऱ्यांकूच न्हय, जाल्यार थंय कामा निमतान येवपी नागरिकांच्या जिविताक धोको निर्माण जाला.
पणजेंतली ही इमारत 100 वर्सां परस पोरणी आसा. ही दोन माळयांची इमारत मोडकळीक आयल्या. हे इमारतीची दुरावस्था पळोवन खात्यान हाचे पयलीच म्हत्वाची कागदपत्रां आनी रेकॉर्ड सुरक्षीत सुवातेर हालयल्यात. पूण थंय काम करपी कर्मचाऱ्यांच्या मनांत भिरांतीचें वातावरण आसा. केन्नाय दुर्घटणा घडपाक शकता. हाचे पयलीं कर्मचाऱ्यांची नवे इमारतींत वेवस्था करपाची मागणी आसा.
मजगतीं, इमारतीची बाबत अवस्था पळोवन सरकारान समाज कल्याण खातें, पर्वरेंतल्या हावसींग बोर्ड बाजार कॉम्प्लेक्सांत व्हरपाचो निर्णय घेतला. पूण हे विशीं अजुनूय कारवाय जावंक ना. नवे कार्यालय तयार जावपाक वेळ लागतलो. तशेंच नव्या इमारतीचे पांखे पत्र्याचे आशिल्ल्यान कर्मचाऱ्यांक वेगळ्याच त्रासाक तोंड दिवचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
