भांगरभूंय | प्रतिनिधी
पणजीः समाज कल्याण खात्यान राबयिल्ली सहायता येवजण बंद केल्या. हे येवजणे खाला खंयचोय निधी प्रलंबीत आसल्यार तो बेगोबेग दितले. हे विशीं खात्यान हालींच अधिसुचोवणी जारी केल्या. फेब्रुवारी 2011 वर्सा अधिसुचीत केल्ले हे येवजणेंत एनजीओंक कार्यशाळा, परिशदो, सर्ती, भलायकी शिबिरां आनी जागृताय शिबिरां घडोवन हाडपा खातीर अर्थीक मजत दिताले.
समाज कल्याण खात्याच्या वरिश्ठ अधिकाऱ्यांनी दिल्ले म्हायती प्रमाण, पोरण्या येवजणेंत एनजीओंक फकत 50 हजार रुपया निधी दिताले. हे येवजणेक व्हडलोसो प्रतिसाद मेळ्ळो ना. हाचो विचार करून खात्यान जानेवारी 2024 वर्सा ह्याच धर्तीचेर मुख्यमंत्री मजत निधी येवजण सुरू केल्ली. नव्या येवजणेंतल्यान एनजीओंक पांच लाख रुपया मेरेन अर्थीक मजत मेळटा. दोनूय येवजण्यो एकठांय चालू दवरचे बदला खात्यान पोरणी येवजण बंद करपाचो निर्णय घेतला.
पोरन्या येवजणे खाला खंयचेय अर्ज प्रलंबीत आसल्यार तांचो बेगोबेग निवाडो जातलो. नव्या येवजणे प्रमाण वयले उपक्रम चालीक लावपाक लागपी खर्चांतले 20 टक्के खर्च एनजीओक करचो पडटा. उरिल्लो 80 टक्के निधी समाज कल्याण खातें दिता. खातें एका अर्थीक वर्सा चडांत चड पांच लाख रुपया दिता. प्रस्तावीत कार्यावळीच्या 15 दिसां आदीं निधी खर्चांतले 20 टक्के आनी हेर अहवाल खात्याक सादर करचे पडटात.
मुख्यमंत्री फेलोशीप येवजणेक मुजतवाड
मजगतीं, नियोजन, सांख्यिकी आनी मूल्यमापन खात्यान सीएम फेलोशीप येवजणेक दोन वर्सां मजतवाड दिल्या. आतां ही येवजण 31 मे 2027 मेरेन चालू उरतली अशें खात्यान जारी केल्ल्या अधिसुचोवणेंत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
