भांगरभूंय | प्रतिनिधी
वाळपय: समाजाचे उदरगतींत भौशीक उदरगत हो म्हत्वाचो घटक. हाका लागून उदरगतीचो प्रवाह सतत चालूच उरता. नागरिकांनी आपले मतभेद विसरून भौशीक उदरगत चालीक लागपाचे नदरेन सहकार्य करप गरजेचें. अशें जाल्यार उदरगतीक वेग येतलो अशें पर्यें मतदार संघाची आमदार तशेंच गोंय वनविकास महामंडळाची अध्यक्ष डॉ. देविया राणे हांणी सांगलें.
वाळपई- ठाणे मजगतींच्या कोपर्डें हांगा पावसांत समस्या निर्माण जाल्ल्यान ह्या रस्त्याक उंचाय दिवपाच्या कामाचो शुभारंभ केल्या उपरांत डॉ. देविया राणे उलयताली. ह्या कामाक मंजुरी मेळोवन दिल्ले खातीर मुख्यमंत्री डॉ. प्रमोद सावंत आनी भौशीक बांदकाम खात्याचे मंत्री निलेश काब्राल हांचे तिणें उपकार मानले.
पावसाच्या दिसांनी हे सुवातेर सतत हुंवार येता. ताका लागून येरादारीक व्हडा प्रमाणांत आडखळ निर्माण जाता. ह्या रस्त्याक उंचाय दिवन पावसाचें उदक वचपा खातीर योग्य वेवस्था करतले. ह्या कामा खातीर 67 लाख रुपया खर्च जातले आनी सांगिल्लें काम तीन म्हयन्यां भितर पुराय जातलें, अशें देविया राणे हांणी स्पश्ट केलें.
ह्या वेळार पंचायतीचे सरपंच सोमनाथ काळे, थळावे पंच वांगडी आनी उपसरपंच राधिका सावंत, पंच सभा सयाजी सावंत, देवस्थानाचे पुजारी यसो सावंत, भौशीक बांदकाम खात्याचे सहाय्यक अभियंते देवेंद्र वेलींगकार, कनिश्ठ अभियंते चंदन नायक आनी हेर हाजीर आशिल्ले.
पर्यें मतदारसंघांत जायते तरेच्यो सुविधायो निर्माण जातल्यो आनी हे संबंदी फाटपुरवण करतले, अशें सांगून पंच वांगड्यांनी भौशीक उदरगतीचेर सतत लक्ष दिवचें. तशेंच आपल्या गांवाक विवीध सुविधायो मेळचे खातीर उपाय सुचोवचे अशें आमदार डॉ. राणे हांणी सांगलें.
ह्या कामाचो दर्जो राखपाचो उलो ह्या वेळार आमदार डॉ. राणे हांणी दिलो.
सुरवातेक श्रीफळ फोडून कामाचो शुभारंभ केलो. हाजीर आशिल्ल्या मानेस्तांक फुलां तुरे भेटोवन येवकार दिलो.
रस्त्या संबंदी चड म्हायती दितना सहाय्यक अभियंते देवेंद्र वेलिंगकार हांणी, ह्या रस्त्यार देड मिटरची उंचाय येतली. तशेंच गटारांचें वेवस्थापन बरे तरेन करतले. पावसांत हांगा उदक साठून उरचें ना. कामाचो दर्जो राखून दवरपा खातीर विशेश लक्ष दितले, अशें तांणी स्पश्ट केलें.
पुराय कार्यावळीचें सुत्रसंचालन थळावे नागरीक उदय सावंत हांणी करून उपकाराचें उलपूय तांणीच केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
