भांगरभूंय | प्रतिनिधी
दुसऱ्यांनी सांगिल्या गजालींचेर विश्वास दवरप आनी त्या खातीर जिवीतान घडपी घडामोडी,कलाकार म्हण दिल्ली वागणूक,अशें कितलेशेच गंभीर विशय…..
कोंकणी नाटक हें गोंयचे संस्कृतायेचें एक खाशेलें आंग. नाटक हो एक दृक- श्राव्य असो साहित्य प्रकार. हो एक सामुहीक आविश्कार. नाटककार, दिग्दर्शक, कलाकार आनी प्रेक्षक हांच्या आदारान नाटक उबें जाता. ताका लागून कविता, कथा, कांदबरी हांचे परस वेगळें थारता. नाटकांतलें नेपथ्य, न्हेसपा येवजण, कलाकारांचो अभिनय, हाव-भाव हीं नाटकांची दृश्य आंगां जाल्यार संवाद, संगीत, ध्वनी येवजण हीं श्राव्य आंगां. गोंयकारांच्या जिणेंची वास्तवपूण दर्शन घडोवपाची तांक फक्त कोंकणी नाटकान आसा असो साक्षात्कार आयज सगळ्याकुच जाला.
कला चेतना वळवय आनी श्रिनिका क्रियेशन नागेशी बांदोडा हांच्या ‘Mr & Mrs दाबोळकार’ ह्या कोंकणी नाटकांन गोंयभर फोंडेंच्या राजीव गांधी कला मंदिरान 132 वो प्रयोग करून लोकांची मनां- काळजां जिखलीं.
हे नाटक फकत मनोरंजना पुरते नासून, समाजाक एक बरो संदेश दिता. आयज काल जें कितें घडटा तें ह्या नाटकांतल्यान बरें तरेन दिसून येता. हे नाटक खरेच प्रत्येक कोंकणी मनशान पळोवन तांतुतलो विचार आपणावपाक जाय. ह्या नाटकांतल्यान जायत्यो बऱ्यो गजाली शिकपाक मेळटात. विश्वास. दुसऱ्यांनी सांगिल्या गजालींचेर विश्वास दवरप आनी त्या खातीर जिवीतान घडपी घडामोडी,कलाकार म्हण दिल्ली वागणूक,अशें कितलेशेच गंभीर विशय विनोदा वरवीं खूब प्रभावीपणान मांडल्यात. हांवें स्वता हें नाटक हाचें आदीं पांच फावटीं पळयलां तरी दर खेपे तें म्हाका वेगळे पद्धतीन जाणवलां, दर वेळा नवे कितें तरी शिकयता.
हे नाटक बरोवपी आनी बसोवपी:- सुशांत लक्ष्मीकांत नायक. गोंयच्या वेवसायीक नाट्यमळार रंगभुयेंची सातत्यान सेवा करपी, सचिन नायक हाका सगळे वळखता आसतलेच. पळोवपाक सादो सरळ पूण लोकांक आपले भुमिकेंतल्यान भरभरून हांसोवप ही ताची कला. ह्या नाटकांन ताणें चार मुखेल भुमिका केल्यात (सागर, कोक्कोक बाबा, पिटर आनी आबोली मावशी) आनी चारुय भूमिका बरें तरेन साकार केल्यो. आबोलें हे तर पात्र सगल्यांची मनां- काळजां जिखून गेलें. गौरेश प्रियोळकार आनी रूची राजाध्यक्ष हांणी आपआपल्या भुमिकांक बरे तरेन न्याय दिलो. तशेंच सरांची भुमिका करपी नवज्योत नायक गांवकार हाणें आपली भुमिका खूब बरे तरेन केल्या. चलयेची भुमिका करपी नम्रता नायक हाणें ती सुंदर तरेन निभायल्या.
पुराय नेपथ्याची जापसालदारकी हेमंत कासार आनी पार्श्वसंगीताची जापसालदारकी तानाजी गावडे हांणी सुंदर रितीन निभायली. मनोरंजनाच्या दृष्टीन गौरेश प्रियोळकारान विनोदी पात्र वेवस्थित पार पाडले. एक चोख बायल वा घरकारीण कशी वेगळी कळाशी दाखोवपी रूचीन आवयचे पात्र जबरदस्त रीतीन निभायला.
आवाजा येवजणेंतल्यान लोकां मेरेन आवाज पावोवपी प्रथमेश आगलोतकार तशेंच उजवाडा येवजण करपी वोप्तेश नायक, माची मांडावळ करपी भावेश गावडे, सुभाष गावडे, सर्वेश गावडे आनी ईश्वर गावडे ह्या सगल्यांनी आपली कामगिरी बरे तरेन सांबाळ्ळी. तांच्या फुडल्या वावरांत तांकां सगळ्याक येस आवडेंता आनी कला चेतनाच्या सगळ्या कलाकारांक आनी वागड्यांक परबीं भेटयतां.
पंकज गुरूदास गावडे
नागेशी बांदोडे
7020069891
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
